Gh’ei mai pensou? Tra i nommi di caroggi de Zena gh’é anche scrito i nommi di vegi mestê. Caroggio de Veie, dove se fava e se sarsiva e veie; caroggio de Cavigee, ch'ean gròsci ciöi da dêuviâse a bòrdo de nave. E pòi o caroggio do Ciongio, do Færo, de Fuxinn-e che n'aregòrdan o giamin di tenpi antighi; o caroggio da Lesca, pe açende o feugo, quello da Peixe e quello di Stopê, cöse inportanti chi a Zena dæto che peixe e stoppa servivan pe câfatâ i bastimenti. E gh'é ancon da çitâ o caroggio in Onzaia, dove s’onzeiva o pelamme con euio de pescio, e Scuaia, dove se fava e se òrnava i scuddi.

Travaggi antighi, travaggi che cangian co-i tempi. E fòscia a nòstra generaçion a l'é ciamâ a mantegnî vivo o regòrdo di sti antighi loei, de arti de 'na vòtta. Magara pe fâ conosce che into Mediteranio l'American Dream, o seunno american, o se ciamava Republica de Zena, un pòsto dove tutti poeivan louâ, goâgnâ, vegnî ricchi, avei a seu òcaxon.

Scignoria!
Franco Bampi