|
Figgia adottiva de Zena, a l'é nasciûa inte l'antiga taera de Sicilia ch'a gh'ha tramandòu quell'anima mistica che a votte a torna là dove, figgieua, lê a l'ha sentïo canti e preghëe di seu messiavi, propio inte quello recanto de 'na taera a-a quae, de segûo, Gerusalemme a l'é ciû vixinn-a. I seu primmi stûddi, comme meistra de scheua, ëan zà orientae a-a stöia da lettiatûa e da filosofia; pe questo in ta zoentû ghe piaxeiva tegnîse da vixin pressiose collessioin de libbri e de scrïti antighi di ciû noti scrittoî italien e foresti. Ma o seu destin o saieiva staeto differente. I problemi che ommi e societae presentan tûtti i giorni, ma sorvia tûtto a coae de fa do ben a-i ätri, l'han spunciä a occûpâse de chi soffriva inte l'anima e in to còrpo. Coscì questa generositae ch'a gh'ha drento a gh'ha averto a porta a-o mondo da solidarietae. A seu assion a no l'ëa tanto fondä in sce-e mille parolle di vari convegni, quante in sciä concretessa di faeti. «Pe sarvâ 'na vitta occôre impegno de energie e de cheu, beseugna pensâ a-o marotto comme se pensa chi se ghe veu ben». Andando appreuvo a questa bandëa a l'é arrivä coscì a piggiâ a Laurea in Mëxinn-a e Chirûrgia e quindi a specializzâse in Anatomia Patologica. Quante tempo a l'ha passòu derrê a 'n microscopio pe çercâ de scrovî, pe tempo, tûtto quello ch'a poeiva pe aerriescî a sarvâ e donne marotte de tûmô! E scibben che a l'agge visto ûn bello pö de sofferensa in sciä stradda ch'a l'aiva piggiòu, a pascion pe-a poexia, zà viva quande a l'ëa figgieua, a no l'é mai scentä: a gh'anava appreuvo pe de longo, in te tûtti i posti, quaexi comme 'na fedele ombra, compagna da seu vitta. Tantiscime son e poexie ch'a l'ha scrïto – ciû de 'na miggiaea - creae e misse in sciö pappê in ti momenti ciû despaegi e in te ciû differenti occaxoin da vitta e do travaggio. Con divossion, o maio Carlo Boggero
E Poexie |
