|
Giuse Casai: Maddalena Giuseppina Sessarego de Nervi
Maddaenn-a Gioxeppinn-a Sessaego a nasce a Nervi o 12 de frevâ do 1909 da 'na famiggia de commercianti do posto; allôa Nervi o l'ëa ancon comûn: o l'é staeto riunïo a Zena in to 1926. Da figgieua a passa quarche anno in collegio dove a l'incomensa a dedicâse a-a poexia. In to 1935 a sposa Gaudio Casai de Ligonchio e da allôa a firmiä tûtte e poexie ch'a scriviä comme Giuse Casai; o maio, a figgia Maria Grazia e i duî nevi, o Tillio e o Dria, insemme a-a casa de Nervi e a-a poexia, son i interesci da seu vitta. A l'arriesce a dedicâse con ciû impegno a-a pascion pe-a poexia da-i settant'anni in avanti, quande a parteçipa a vari concorsci, a scrive tûtti i meixi in sciö bollettin da Parrocchia de Nervi, a piggia parte, assemme a ätri poeti zeneixi, a-e trasmiscioin de quarche radio privâ, a frequenta comme socia "A Compagna de Zena" e a l'appare ascì in scï giornali çittadin con de poexie de "denunsia" in ti riguardi dell’Amministrassion Comûnale che tanto a l'ha faeta soffrî a-i tempi di espropri pe-a realizzassion de Corso Europa. Da-e seu poexie, semplici e descrittive, sciorte feua sorvia tûtto o grande amô pe-o mâ, i scheuggi, e case e a gente de quello che lê a pensava fïse ûn posto incantòu de Ligûria: o portixeu de Nervi. Ligae a quest’ûrtimo gh'é ben ben de poexie, di regordi de zoentû che descrivan ûn mondo de abitûdini e comportamenti ormai sparïi. In ogni moddo a scrive de tûtta a "seu Nervi" e çerte poexie in italian son dedicae a-i paixi dove a passava e stae co-a famiggia portando ûn pittini do seu "ëse de Zena": Ligonchio in Emilia e Sottovalle in to basso Piemonte dove a meue o 26 de settembre do 1999. A mae nonna, o mae "Mottin".
E Poexie
| ||||||
