L'ARTÂ DI APOSTOLI IN SAN LOENSO
(INTERPRETE - CANONICO MARMO)

Ûn giorno de Pasquëta, dòppo Vespro,
dûxento, circa çinquant'anni fa, (1)
i Santi Paddri, ch'aivan ascistïo
in San Loenso a-a funsion pontificale,
e faeto o bagno a-a lasagnata gianca
con do sciûto vinetto de Cônâ,
(scordandose che i zeughi son do Diao)
han combinòu ûnn-a partïa a-e bòcce,
stando insemme San Pê, San Gieumo e Abrammo
contra o Battista, San Paolo e Mosè.
Pe ûn pö a demôa a l'ëa andaeta ben,
proprio comme se deve fra personn-e
passae a-o siassetto da Romana Gexa;
ma, a-a fin da föa, pû co-a sorveggiansa
do Segnô, ch'o zeugava feua de lì,
a nativa pascion de l'interesse
a l'ha axoïo a-i Patriarchi o bon ûmô.
Zûgâ, s'aivan zûgòu solo da beie,
l'é vëo; ma co-o venin poi de traverso,
senza manco pensâghe, ëan passae
da-i södi a-e lïe e da l'argento a l'öu.
Quande Mosè co-i sò o l'ha faeto taggia
s'ëa zà, 'n sà e 'n là, sentïo quarche mocchetto,
ma, Lê o saiva fâ oëge da mercante
e, a conti faeti, o presentava a nòtta
da liquidâ 'n sce l'atto, finn-a a-o citto!
Abrammo, ch'o sae staeto ròuzo assae
solo pe-o zeugo perso, o l'ëa do Diao
d'ësise accòrto ch'ûn di sò compae,
(quello ch'o ha sempre i grimadelli in man)
o gh'aveiva locciòu tròppo in to mànego,
comme se proprio o voese fâ castagna:
coscì o çercava de tiâ o cû inderrê
protestando a camôra, ne-a speransa,
se o no riusciva a giâgheli in San Zòrzo, (2)
d'arrangiâse pe rotto a-a bella a-a mëgio.
Ma con de facce sante de sta menn-a
ätro ghe voeiva che minacciâ scandali!!
«Chi zeuga ha da stâ a-a pèrdia comme a-o guagno»
sentensiava Mosè, l'ommo da Lezze!!
Visto allôa che o mastin o no mollava,
ansci o spediva Paolo da-o Segnô
a imboccâlo, se o poeiva, a favô sò,
o s'é lasciòu piggiâ da-o Santo Sdegno
e o ghe ha mezûòu un stòulon, giandoghe a schenn-a.
San Gieumo, meschinetto, ch'o no saiva
o Cum, o Rum, o Biscu e a Santa Croxe, (3)
spaventòu da quell'atto do compagno,
e temendo de pëzo, o criava: «Paxe!»,
mentre o Bacciccia, che, meno a mangieuia,
o sò tòcco o se o fava zà in ta stacca,
dandoghe a taa, contento o se ne rieiva.
Paolo o ciccioava ancon drento in ta niccia
co-o Prinçipâ, scöxindo i patiscimili
e piggiando e difeise de San Pê,
che, lì dappresso, pronto a denegâ,
segondo o sò vissiëto, o stava sitto
sforzandose de fâ l'indifferente,
scibben che in to sò interno o tribolesse,
comme quande o sentiva cantâ o gallo!!
Gexû Cristo, assetòu 'n sce ûn scambelletto,
co-a man scinistra o l'arrezeiva o Giobbo,
e, ascidiòu in cëa , comme chi rïe d'angoscia,
pensando fra Lê e Lê, paiva ch'o disse:
«Questa ancon me ghe voeiva!... A l'é a manëa
de contegnîse fra Beati e Santi?
Se tanto me da tanto, che mäveggia
se, da ûn momento a l'ätro, anche a marmaggia
ch'a formigoa a milioni in sce sta boccia,
a crïa: "Morte a Gexû, viva Barabba!"?
Dunque ve-o canto in mûxica: son stûffo;
e ûn ätro pö che me fae giâ a santiscima,
ghe diggo a-o Poae ch'o dagghe inderrê a-o tempo
finn-a che l'Ûniverso o torne a-o scûo
e Lûcifero in Çê co-i ätri Arcangei,
comme primma che o Verbo o disse: «Fiat»,
ch'o l'é staeto o motivo d'ogni guaio!!»
A sto moddo se spiega l'opea d'arte
di Da-Porta e Compagni (4) in te l'artâ
di Apostoli, pe no dî de zenogge: (5)
chi, poi, sospetta ch'agge imbroggiòu e carte
pe fâ credde che a sciocca (6) a l'é fainâ,
ch'o vegne a vedde se mi conto cogge!!

* * *

Zena, 1-1-1832