Due parolle, 'na stöia

Due parolle, 'na stöia
zeneise@francobampi.it

Intrâ > Mi chi > Due parolle, 'na stöia
[ Inderrê ]

L'ultimatum

Accettâ tûtte e richieste do Re Sô (o Luigi XIV):

	che seggian i zeneixi a salûâ sempre pe primmi i françeixi,
	che i françeixi possan avei o depoxito da sâ a Savonn-a;
	che seggian misse in disarmo e quattro galee allestïe pe-a difeisa de Zena;
	che i zeneixi domandan perdon pe no avei obbedïo primma.

In caxo conträio Zena vegniä bombardä e destrûta.

O bombardamento

O Senato de Zena o no se cega. A-a seia do 17 de mazzo do 1684 i françeixi incomensan o bombardamento de Zena. Doppo avei cacciòu seimilla bombe, i françeixi reneuvan l'ultimatum. O Gran Conseggio, con quattro voti contra, o decidde

	de risponde che no l'é poscibile trattâ sotta a-o feugo do nemigo,
	de mette Zena sotta a protession do Segnô e da Madonna,
	de mostrâ a-o mondo a tremenda prepotensa di françeixi.

O bombardamento o repiggia e o finisce o 22 de mazzo quande i françeixi no gh'han ciû de bombe: ne han tiòu trezzemilla!

A Versailles

Zena, abbandonä da tûtti, a no peu fâ ätro che accettâ o voei do Re Sô. E quello Re o veu 'na cösa de ciû: che o Dûxe o vadde a Versailles a rendighe omaggio. E coscì o Dûxe de Zena, ch'o l'ëa o Gian Françesco Maria Imperiale Lercari, o deve partî pe Pariggi. A l'é a primma votta in ta stöia che 'n Dûxe o deva lasciâ Zena.

Mi chì

O 15 de mazzo do 1685 o Dûxe de Zena o l'é a Versailles, riçevûo con 'n mûggio de önoî e de sfarsi. O seu comportamento o l'é riservòu e dignitoso. E quande ûn o ghe domanda cöse o l'agge ciû mäveggiòu lì a Versailles, lê o l'risponde: Mi chì! Comme a dî: Che segge mi a dovei domandâ scûsa a 'n Re che o l'ha faeto tanto patî a mae çittae, Zena.

Anche pe questo o Vito Vitale o l'ha commentòu che l'ûmiliassion do Dûxe de Zena a fa ciû torto a chi l'ha imposta che a chi l'ha sûbïa.


O bombardamento de Zena do 1684	O Dûxe o l'incontra o Re Sô
Sciacca in sciä foto pe ingrandila

[ Inderrê ]