|
LiguriaItaliaEuropa n. 3, 3 dicembre 2001 La storica notte del "Confeugo", dal 1300 ad oggi, una delle tradizioni più amate dai genovesi
E ciû antighe notissie in sciö «Confeugo» a Zena son di primmi anni do secolo XIV, ma l'é quaexi segûo, anche se no provòu da documenti, che l'ûso o l'ëa ciû antigo. L'offerta a l’ëa faeta primma a-o Poistae, cappo do Comûn, poi a-i Capitanni do Popolo e, da-o 1339 in avanti, a-o Dûxe. A çeimonia do Confeugo a l'ëa o salûto do Cappo d'Anno: o regallo do popolo a-e ciû äte careghe do Stato e o scangio di augûri pe-o neuvo anno, che in to medio evo o l'incomensava co-o 25 de dexembre, a Nativitae do Segnô. O ciû importante regallo do Confeugo o l'ëa ûn grosso çeppo d'öfeuggio, coverto da-e ramme e imbellïo de frexetti gianchi e rosci. O privilegio da consegna o l'ëa riservòu, foscia scinn-a da-o 1307, a-i Abboei do Popolo, rappresentanti de Podesterie do Besagno, do Ponçeivia e de Vôtri, ma quaxi sûbito limitòu a-o solo Abbòu do Besagno. L'ûrtimo Confeugo o l'é staeto faeto dall'Abbòu Antogno Bazzorao da Parrocchia de San Martin de Struppa o 24 de dexembre do 1796. A çeimonia a l'é staeta definitivamente soppressa da-a rivolta giacobinn-a do 22 de mazzo do 1797. Doppo ben 127 anni l'associassion zeneise «A Compagna» a stabilisce de consegnâ o «Confeugo» a-o primmo çittadin de Zena. O 24 de dexembre do 1923 ûnna cianta d'öfeuggio adorna de tinte rosso e gianco a vegne solennemente consegnä a-o scindico senatô Federico Ricci. Questa çeimonia, «con grande partecipassion do popolo» a l'é anche a mëgio occaxon pe rinnovâ i rapporti che devan ëse tegnûi tra l'amministrassion comunale, o scindico e i çittadin. O l'é o momento in to quae vegnan scioae tutti i «mugugni» in scï problemi da çittae che no son staeti risolti e vegnan daeti i arregordi, con l'augurio e a speransa che o scindico e l'amministrassion comûnale ne tegnan conto. L’ûrtima çeimonia primma da guaera a l'é staeta quella do dexembre do 1937. «O Confeugo» o saiä continuòu 15 anni doppo, con ûnna vixita augûrale a-o scindico Vittorio Pertusio. Da-o 1952, a çeimonia a continua de anno in anno de longo con l'offerta de l'öfeuggio completä, da-o 1974 in avanti, «da-o tondo de Natale»: ûn tondo de ceramica decoròu a man segondo a tradission artistica ligure. Da quarche anno a çeimonia a ven faeta a Päxo dove se brûxa ascì ûn scimbolico çeppo d’öfeuggio.
[ Inderrê ] |
