|
LiguriaItaliaEuropa n. 6, 6 settembre 2002 "Libertà di trafficare, di produrre denari, e di diventare ricchi"
Mazzo do 1814: Zena a no voeiva propio pe ninte che e seu taere fïsan riûnïe a-o Regno de Sardegna, comme e voxe da Vienna lasciavan intende. O marcheise Gûstin Pareto o se dava ûn gran daffâ pe difende l'indipendensa de Zena. O diva che in te ciû de duî secoli e mëzo, da-o 1528 a-o 1797, o Governo de Zena o l'aveiva de longo faeto o ben da Nassion; ch'o l'ëa, pe seu natûa, quello ch'o costava de meno de tûtti i Governi d'Europa; e tasce ëan ben ben lëgie e no gh'ëa quaexi ninte da pagâ pe-o commercio. Mantegnî tûtto questo l'ëa poscibile pe 'n paise libero, sensa smangiaxoin de conquista, ma no pe 'n stato comme o Piemonte, gravòu da-e speise da Corte e dell'esercito. Queste belle parolle, co-e quae o Pareto o l'ha difeiso invan l'indipendensa de Zena pòco primma do Congresso de Vienna, ne mostran comme a l'ëa Zena pe 'n davvei: ûn stato dove gh'ëa a libertae: libertae de traffegâ, de prodûe di dinae, de vegnî ricchi. E i ricchi poeivan, diversamente da ätri stati (ûn pe tûtti Venessia), vegnî anche nobili. E o bello de tûtto questo o l'é che i povei ascì stavan ben: a Repubblica a dava travaggio e prosperitae a tûtti. A preuva a l'é che mai, in ta stöia de Zena, o popolo o s'é ribellòu a-o seu governo: o l'ha piggiòu e armi e tiòu prionae solo contra i foresti che l'occûpavan. E i ciû deboli riçeveivan da vëa solidarietae. L'Ûspiâ de Pammaton o l'ëa ûn di mëgio d'Europa; l'Albergo di Povei a l'ëa 'n'istitûssion all'avanguardia; o Banco de San Zorzo, o forsê de famigge zeneixi, a l'ëa 'na banca ch'a saieiva moderna ancon ancheu. E no scordemmose che a Repûbblica a gh'aiva di fondi, gestïi da-o Banco de San Zorzo, pe dâ e deutte a-e figge povee. I foestê che vegnivan a Zena pe travaggiâ ëan ben visti e poeivan diventâ çittadin zeneixi sensa tante formalitae: bastava che rispettessan i ûsi e e lezze de Zena! Dâse da fâ, rispetto do travaggio, vëa solidarietae, ninte discriminassioin: ecco i valoî da Repûbblica de Zena: ûnna repûbblica federale (Parodi e Noli gh'aivan statûti seu) ch'a refûava a guaera de conquista preferindo, in to caxo, pagâ e taere che ghe servivan, de spesso pe riscattâ e genti da-i scignori do posto. Valoî nasciûi da 'n ûso da libertae ch'o l'é staeto bon de mesciâ tûtto o mondo.
Sciacchighe addòsso pe ingrandîla [ Inderrê ] |
