Zena e l’Eoröpa

De segûo Zena, e con lê a Ligûria, a l’é stæta ‘na grande potensa in sciô mâ: fòscia into Trexento adreitûa a ciu grande potensa do Mediterànio e quindi de tutto o mondo d’alôa. Se dixe che scinn-a Ricardo “Cheu de Lion”, re d’Inghiltæra, into 1190 partindo pe-a tersa Croxâ o l’agge domandòu a Zena o permisso de deuviâ, pagando, a bandêa da çitæ (ch’a l’é a bandêa de San Zòrzo, croxe rossa in canpo gianco) perché quella bandêa a metteiva poia in scî mâ e a vegniva rispetâ. Pe questo a bandêa de l’Inghiltæra a l’é pægia a quella do Comun de Zena.

Into Çinqueçento quarcösa cangia: gh’é e neuve tære de l’America e o nòstro Mâ Mediterànio o l’é vegnûo picin picin e o no l’é ciu inportante comme ‘na vòtta. Senpre inte quello tenpo, i doî Döia, o Drîa e o Gianandrîa, àn fæto neuve lezze e neuve aleanse. Pe-i Zeneixi tutto questo o l’à vosciûo dî che i tenpi di tràfeghi con l’Oriente êan finîi. No gh’àn pensòu doe vòtte: sensa métise a cianze se son subito dâti da fâ pe andâ apreuvo a-i cangiamenti: da naveganti se son trasformæ in finansieri boin a inprestâ dinæ a tutta l’Eoröpa, a tegnî in pugno re e imperatoî, e a resciste a ben quattro falimenti da coronn-a spagnòlla, fæti aposta pe no restituî e palanche che i Zeneixi gh’aivan inprestòu.

Atri tempi, quelli d’ancheu! Ancheu gh’é l’Union Eoropêa; e inte sta Union gh’é l’Italia ma no gh’é a Ligûria, co-a seu coltûa, a seu stöia secolare e, sorviatutto, i seu grendi valoî: tra questi a vêa solidarietæ (alôa dita beneficensa) e o refûo da goæra comme arma pe dominâ i pòpoli, valoî che saieivan un de ciu pe tutta l’Union. Fòscia o gh’aiva in mente ste cöse chi o Geo Pistarin, profesô de Stöia medievale a l’Universitæ, quand’o l’à scrito che, segondo lê, a Confederaçion eoropêa a no deve nasce da-i Stati che gh’é ancheu, figgi di naçionalismi de l’Euttoçento, ma a deve nasce da l’adexon de-e naçioin storiche, quelle che sciòrtan torna feua òua che a situaçion economica e sociale eoropêa a l’é cangiâ. E mentre neuvi stati picinetti ma indipendenti, comme Malta, Cipro e e træ Repùbliche Baltiche, intran in Eoröpa, a Ligûria a no l’ariesce manco a eleze un parlamentare eoropêo.

A mi me pâ che saieiva o caxo d’appensâghe in pö adosso a sta stöia da nòstra tæra p’acapî cöse se posse fâ pe tornâ a contâ in Eoröpa, comme pe-i tenpi passæ, quand’emo indipendenti e responsabili di nòstri destin.

Scignoria!
Franco Bampi

[ Inderrê ]