|
LiguriaItaliaEuropa n. 7, 4 dicembre 2002 Politiche sociali ante-litteram nella Repubblica di Genova
O primmo problema de tutti i pòpoli in te tutti i tempi a l'é a famme. Sto problema o l'é stæto affrontòu da-i vari stati in tanti mòddi diversci. Chì, in ta Repubblica de Zena, s'é çercòu de levâ da-e stradde i pövei che domandavan mettendo addreitùa in pê 'n'istitussion, dita "Magistròu de Misericòrdia" ch'o l'accuggeiva e palanche pe asciste chi n'aiva beseugno. Chì, in ta Repubblica de Zena, nisciun o l'é stæto lasciòu moî de famme pe-a stradda. L'ascistensa e a solidarietæ, alloa ciammæ beneficensa e misericòrdia, ean 'n obbligo pe chi governava: chi gh'aiva i dinæ o doveiva tiâne feua un pö pe çercâ de fâ stâ megio i ciù sfortunæ. E a Repubblica a l'intervegniva ascì dando a deutta a-e figge pövie co-e rendite di Leughi de San Zòrzo. Pure interessante l'é vedde comme ean trattæ quelli che travaggiavan a salaio: i operai. Chì, in ta Repubblica de Zena, za primma do 1573 l'ea assolutamente vietòu de pagâ i operai in te l'òdiosa forma de sfruttamento ch'a l'ea quella de dâ parte da paga in cöse, de sòlito röba da mangiâ, invece che in dinæ. Ma stæ a sentî cöse succedeiva a-e cartee de Votri. Quande o prexo do pappê o vegniva tròppo erto (quande o passava e trentesei lie pe balla, dixe i documenti), e gh'ea quindi o pericolo de 'na speculassion commerciale a-i danni di laoanti, a Repubblica de Zena a l'intervegniva imponendo a-i proprietai de vende all'asta o pappê coscì da avei i dinæ pe poei pagâ i operai. In te sto mòddo chì se evitava che a röba a vegnisse ascosa pe fâ montâ i prexi, fæto dannoso segge pe-i operai segge pe-a monæa de Zena. Fòscia saiâ anche pe sti fæti chì che mai, diggo mai, o pòpolo de Zena o s'é ribellòu a-o seu governo. Quand'o s'é sollevòu o l'ha fæto pe giâse contra i nemixi foresti, austriachi ò piemonteixi no contava: a l'ea solo gente ch'a voieiva o mâ de Zena. E ancon ancheu in ta Stradda Gramsci, dove gh'é o mercòu dito “Shanghai”, vixin a-o pòrtego numero 29, gh'é ‘na targa ch'a n'arregòrda che l'òste Zane Carbon, dòppo a rivolta do Balilla, o l'é andæto a portâ e ciave de Zena a-o Duxe dindoghe che a proscima vòtta o doveiva stâ ciù attento a no fâsele piggiâ. Ecco comme andava e cöse tra Zena e seu pòpolo.
Sciacchighe addòsso pe ingrandîla [ Inderrê ] |
