C: Ti o sæ Frànco, tànte vòtte sucêde che, scibén che no ti veu, te tócca de stâ a sentî cöse dîxan quélli che te stàn da vixìn...

F: ...e za, sucêde. E de spésso ti sénti sôlo a strepélli che no ti riêsci mànco a capî de cöse pàrlan!

C: Bén quélla vòtta li êo co-o Tilìn a mangiâ quarcösa inte 'n ostàia de Pedemónte e pròpio vixìn a-a töa dôv'êmo niâtri gh'ea quàttro vegétti che parlâvan a vôxe èrta che no ti poéivi no stâli a sentî.

F: Inti sti câxi gh'é da sperâ che armêno dìgan cöse interessànti...

C: Mah, no sò. A 'n çèrto pónto se són mìssi a parlâ di dinæ e dîvan che e palànche no vàn stragiæ, ma arivæ a-o pónto do "Romêo o bótte"...

F: In nómme ch'o l'é tùtto in progràmma!

C: I bèlli nomiâgi de 'na vòtta! E dîvan che o Romêo o bótte o travasâva o vìn inti botigioìn... pe risparmiâ 'n sciô tàppo!

F: 'Na bèlla sciortîa!

C: Ma o pêzo o l'é ch'o l'uzâva ànche tàppi za dêuviæ, magâra pertuzæ e o vìn o vegnîva axòu. Coscì, pe risparmiâ in sce 'n tàppo, o caciâva vîa di lìtri de vìn bón...

F: Ah sti zenéixi! Génte divèrsa...