C: L'êa 'n ciæto, câo mæ Frànco, riêscî a arivâ a fin do méize inti ànni sùbito dòppo a goæra!

F: Me l'imàgino. Scibén che a ricostruçión a l'àgge pöi portòu a-o "boom" di ànni susciànta, gh'ò l'inpresción che a vìtta di ténpi che ti me cónti a fîse dûa.

C: A l'êa dûa pe coscì! Pe quésto l'Armàndo, un ch'o stâva chi da niâtri, o l'àiva pensòu bén, tànto pe fâ quàrche lòu e goâgnâ quàrche frànco, de arvî 'na bitêga da salumê. E miâge o l'àiva atrovæ e òua o l'àiva bezéugno da röba da vénde.

F: E lê o no sàiva dôve andâla a acatâ!

C: Òh no! O l'àiva za comensòu a tratâ co-in groscìsta e quànde l'é stæto l'ôa de dovéi acatâ a röba o l'é anæto da lê e o gh'à fæto a lìsta: "Aviæ bezéugno de quàrche fîa de salàmme, do xanbón, do formàggio parmixàn, de 'n pö de bêle sótta sâ pe fâ da lugànega. Insómma tùtte quélle cöse che sèrvan a 'n salumê.

F: Bén, ma alôa quæ o l'é o problêma?

C: O problêma o l'é che quànde l'é stæto o moménto de pagâ l'Armàndo o gh'à dîto che a röba o a pigiâva sùbito, ma che o l'aviéiva pagòu un pö pe vòtta, manamàn ch'o goâgnâva i dinæ.

F: Ma coscì són tùtti boìn!

C: De fæti o groscìsta o l'à amiòu l'Armàndo stòrto e o gh'à rispòsto: Vedéi voî, no gh'éi bezéugno de röba da vénde. Voî gh'éi bezéugno de palànche!