C: Æ sci, câo Frànco, sta stöia chi, scibén ch’a no l’é sucèssa in Sàn Pê d’Ænn-a, a l’é ariâ fìnn-a da niâtri.

F: Veu dî ch’a saiâ ’na bèlla stöia. Dàghia, cóntimela!

C: Gh’êa doî amîxi che stâvan into pàize de l’órso...

F: ...t’eu dî Sànt’Orçéize pe vîa de l’órso ligòu a-o zôvo insémme a ’n beu...

C: Sci. O l’àia amasòu l’âtro beu coscì o Sànto o l’àiva costréito a fâ lê da beu, ma sta chi a l’é ’n’âtra stöia. Tornémmo a-a nòstra. A-o pàize i doî êan conosciûi ciù che-a betònica e tùtti ghe domandâvan conséggio. Coscì quànd’àn fæto a Ferovîa Zêna – Casélla àn pensòu bén de provà’n pö sta novitæ pe savéi cöse contâ a-i paizén.

F: Ànche alôa a génte a voéiva infriciâ o nâzo inte tùtto.

C: L’é coscì che sti doî amîxi àn decîzo de pigiâ o trenìn. E un o dîxe a l’âtro: “Mîa che ghe da pagâ o bigétto!” E l’âtro: “Ma figùrite ’n pö sò-u paghémmo!” E móntan in sciô trenìn. Dòppo ’n stisinìn o l’arîa o controlô e o ghe domànda o bigétto. Ti sæ cómme se l’àn mêgâ?

F: No, dìnni.

C: Gh’àn dîto: “E voî ne domandæ o bigétto a niâtri? Ma niâtri sémmo chi a fâ ’n gîo de prêuva pe acatâ tùtto o trêno e voî ne domandæ o bigétto? Dîne ’n pö cómme ve ciamæ che coscì scistemémmo a cösa sùbito”. O controlô o s’é atrovòu un pö de poîa, o s’é scuzòu che nisciùn o l’àiva avertîo e a cösa a l’é finîa li.

F: Insómma te l’àn inverdugòu bén bén.

C: E za: se l’àn scapolâ coscì. I scistêmi di ténpi pasæ funçionâvan, sæ...