C: Ti sæ, Frànco, quànde se nàsce co-a dæta inte ìn mòddo, no l'é che ti peu cangiâla!

F: Perdiesànn-a, Càrlo, dôve t'æ frigognòu p'atrovâ a paròlla dæta?

C: Beh, dæta pe dî capaçitæ, êse bón a fâ, predispoziçión. Cómme a dæta di camàlli ò di canterìn de squàddre.

F: Eh sci, quélli che càntan con tànti rebîghi!

C: Te dîva, Frànco, o Tontolîni, che te n'ò za parlòu, o gh'àiva 'n nomiâgio ch'o l'êa a seu dæta. Òua ti t'aregordiæ che inti ànni Çinquànta l'êa sciortîo e covèrte elétriche...

F: Eh se m'aregòrdo! E câze êan frèide e p'ascâdâse e covèrte elétriche êan mêgio do præve.

C: E defæti o figìn do Tontolîni o se lamentâva d'avéi de lóngo fréido a-i pê. Alôa o Tontolîni o l'é stæto pigiòu da-a smangiaxón d'arangiâse da sôlo. Ispiròu da-e covèrte elétriche, o l'à pigiòu 'n pâ de câsétte, o gh'à inandiòu quàrche fî elétrico, dötræ rexisténse e o l'à inbastîo, con pöche palànche, e "câsétte elétriche"!

F: 'N òmmo pìn de fantaxîa.

C: Tò-u racomàndo! Pe provâle o l'é anæto da-o Bröli. A dî a veitæ o se ciamâva Brolis e o riparâva biciclétte, ma niâtri, in zenéize, se refuémmo de dî a èsse finâle.

F: T'æ pròpio raxón! No-â dìmmo!

C: O Tontolîni o l'arîa da-o Bröli co-o figìn, o ghe infîa e "câsétte elétriche" e o l'atàcca tùtto sto cöso a-a préiza. Sto figìn o l'incoménsa a sbragiâ cómme 'n màtto! Stàcca tùtto, lêvighe e câsétte, ma ancón gh'é bruxâva i pê!

F: E alôa?

C: Te l'ò dîto chò-u Bröli o l'agiustâva e biciclétte. Li da-a vixìn gh'êa unn-a de quélle cónche fæte a èrco dôve se ghe pàssa e gómme pe védde dôve són pertuzæ. Bén àn pigiòu o figìn e te l'àn ciaciòu li drénto! Un pö de resciöu dòppo avéi pigiòu a corénte!