F: Segûo chò-u zêugo do balón o l’é ’na pasción pe ’n sàcco de génte. Cöse pöi gh’atroviàn de bèllo...

C: Ma quànde a pasción ti ghe l’æ no t’amîi in fàccia a nìnte. Cómme quélla vòtta quànde mæ fræ o Tîno o l’êa a militâre...

F: Ghe sémmo tórna! Ebén?

C: Bén o càppo da conpagnîa do Tîno o l’êa un sototenénte co-ina stelétta (ma se ghe dîxe tenénte) ch’o l’êa pèrso pò-u balón. Coscì, a-o pòsto de l’adestraménto lê o fâva zugâ i sordàtti a-o balón.

F: Béh, almêno se demoâvan sénsa stâ a fâ tànte màrce.

C: Eh za. Sucêde coscì che durànte ’na partîa mæ fræ o da ’n ronsón a-o tenénte, o quæ o se ghe gîa dìndoghe de stâ càrmo e d’amiâ a stelétta ch’a l’êa cuxîa in sciâ seu spalìnn-a. Ma o Tîno o no s’é pèrso d’ànimo e o gh’à dîto che ’nto zêugo êan tùtti pægi.

F: Chi a se métte mâ...

C: Quàrche giórno dòppo o tenénte o mànda a ciamâ mæ fræ.

F: Gh’ò indovinòu!

C: Quànde o Tîno o l’ìntra inte l’ofìçio o tenénte o ghe domànda: “Dìmme cöse ti véddi de divèrso”. Ma, bàcere, ànche a-amiâ bén, tùtto o pàiva cómme prìmma. Alôa o tenénte o ghe móstra a spalìnn-a. E stavòtta e stelìnn-e êan dôe.

F: Ah! L’àivan pasòu de gràddo! Òua o l’êa tenénte pe ’n davéi!

C: Sci. Ma o s’é vosciûo levâ a sodisfaçión de dî a mæ fræ: “Chi no sémmo tutti pægi! Gh’é chi gh’à e stelìnn-e e o comànda e chi no gh’é l’à e o dêve stâ sìtto e òbedî!”

F: A gh’é costâ fìnn-a pöco!