Dove o se ghe meteiva o ghe meteiva sorviatutto o cheu. O Baglini – che mi, pe demôa, azeneizavo in “Bagìn”, com’a dî in baggio (rospo) picin – o l’é stæto o mæ mego de famiggia; e pe-a mæ famiggia ’na voxe de gran conforto inte ’n momento difiçile: ancoasæ ch’o gh’ea lê! Da penscionou, tra e mille cose ch’o l’à segoitòu a fâ, o s’é misso apreuvo a-a biblioteca da Compagna e o l’ea o console bibliotecaio. Anche pe niatri da Compagna, comme pe tutti i atri, o l’ea in ponto de riferimento, de longo disponibile a fâ tutto quello che serviva: camalase o gonfalon, anâ a pigiâ a fugassa, mette a posto a sala doppo ’na festa in sede. Ma o se prestava anche pe fâ bello o nostro Boletin (comme do resto o fava co-o nostro Gazetin ascì), pe scrive tocchi in zeneize, recençioin de libbri e, con gran pascion, pe fâ ciù bella e ciù ricca a nostra biblioteca sociale: gh’aivimo ’na migiâ de libbri, con lê emmo pasou i treimilla! Comme tutti quelli che l’àn conosciuo san, l’ea inte discuscioin che sciortiva feua o seu spirito toscan: a batua pronta, a voentæ de no molâ, a coæ de ponzigiâ quande-e cose no anavan pe-o seu verso. O ne manchiâ o Baglini, mæ cao Bagin, pe tutto quello ch’o fava, ma o ne manchiâ de ciù pe l’amigo sincero ch’o l’é stæto pe tutti niatri.

Franco Bampi