Da un’idea di James P. Hogan

1. O pròlogo

Ghe mancava solo questa. No bastava o cado de luggio e l’invexendo da partensa: ghe voeiva anche ’n mòrto! Beh, pe dî a veitæ, ciù che ’n mòrto o l’é ’n scheletro. Ma l’àn atrovòu dôve o no doveiva ese: in sciâ Lùnn-a. Coscì son za mezo vestîo con sto tònni da viagi spaçiali pe montâ ’n sce l’astronave (’na specce de fùrgou, ma ’n pö ciù grande) e anâ, co-î atri sêi, lasciù a vedde. Fortùnn-a che, a-a giornâ d’ancheu, inte ’n giorno e mezo s’aria in sciâ Lunn-a.
O rapòrto o dîxe, che mentre a squaddra a fava di pertuxi p’atastâ o terén pe-a neuva baze, pròpio li, tramezo a-e prîe e a povie, àn atrovòu in scheletro de ’n òmmo. O problema o l’é che l’àn atrovòu inte ’n pòsto dove no gh’ea mai anæto nisciùn e ch’o paiva bén bén ciù vêgio de l’epoca di prìmmi viâgi che émmo fæto chi in sciâ Lùnn-a. Mah... saiâ ’n scherso de quarche bonelàn...

2. A sorpréiza

No ghe ninte da fâ: o mêgo o zua e o sperzua ch’o l’é ’n scheletro de ’n òmmo visciuo, ciù ò meno, çento çinquantamil’anni fa! E vanighel’a dî che no l’é poscibile, che çento çinquantamil’anni fa l’òmmo in sciâ Lùnn-a o no gh’êa ancon stæto. Ma cöse diggo! O no l’êa ancon nasciûo manco in sciâ Tæra... Eh sci! Raxoæle da meghi. E mi ne conoscio un che in quant’a scemaie o l’é ’n meistro! Mentre niatri fixici...
Ma tò-u sæ che quel’angæzo de ’n mego o gh’aiva raxon? Tutte e analixi mostran che o scheletro o gh’à çento çinquantamil’anni: un scheletro de ’n òmmo de çento çinquantamil’anni in sciâ Lùnn-a! E comm’o gh’é stæto stracoòu?

3. A scovèrta

A novitæ a l’é ch’àn atrovòu ’na scatoa, ’na specce de computer, li da-a vixin a-o scheletro; a desdiccia che nisciun gh’acapisce ninte! Nisciun, feua do Stevin “Sgoara CD” che co-i computer o fa di strionezzi che te lascio dî. Ben, tra no goæi , quarche setemann-a a-o ciù, saviemo de che mòrte bezeugna moî. Òps... parlando de scheletri, fòscia, sta cösa chi no doveivo dila...
Da no credighe! Tutta a stöia de l’òmmo a l’é da riscrive! O Stevin “Sgoara CD” o l’à scoverto che quella scatoa ch’o l’à ezaminòu a contegniva quello che niatri ciamiescimo “libbro de bòrdo”. Bén voei savei cöse gh’ea drento? Asetæve in sce ’na carega, pe no cazze, che vò-u conto.

4. A stöia

Quarche çentanæa de migiæa de anni fa, a Tæra a no l’ea popolâ da òmmi. Bestie, erboi, sci, quelli gh’ean, ma òmmi no. Pe-a poziçion do scistema solare inte l’universo, aloa se poeiva vive anche in sce Marte, Venere e in sce ’n bello pö de lunn-e de Giöve e de Saturno. E tutti quelli còrpi celesti ean popolæ da vitte inteligenti, no tutte pæge, s’acapisce: in pö comme sucede co-e bestie chi in sciâ Tæra. E comme chi in sciâ Tæra ean ben ben rateloxi: saivan viagiâ da ’n pianeta a l’atro, ma ciù che atro pe fâse a goæra.
Pròpio çento çinquantamil’anni fa, gh’ea in corso ’na teribile goæra: i Ganimedien, che stavan in sce Ganimede, un di sateliti de Giöve, ean li pe ese subacæ da quelli di atri pianeti, che s’ean coalizæ tutti contra. Ma i Ganimedien ean tra i ciù fei: in previxon de perde aivan scistemòu de armi che avieivan destruto a vitta de tutti i atri pianeti.
L’urtima astronave di Ganimedien a l’ea stata colpîa e a l’ea preçipitâ in sciâ Lunn-a: o comandante, primma de moî o l’aiva ativòu a destruçion de tutti i atri pòpoli: saieivan mòrti tutti dizintegræ. I pöchi che ean co-o comandante, saiva a dî i unici sopravisciui, se doveivan trasferî in sciâ Tæra segoindo e indicaçioin fæte da ’n’avangoadia de Ganimedièn inta zona che ancheu niatri ciamemmo Nazca. O scheletro ch’emmo atrovòu in sciâ Lunn-a o l’é quello do comandante... Son arestòu sensa paròlle.

5. A macàia da stæ

Un bagio, e ti t’acòrzi che o lenzeu o l’é tutto bagnòu da-o sûo. M’asetto mezo adormîo in sciâ sponda do letto. Gh’é sofoco e a testa a me fa ’n pö mâ. Ma mîa che seunno che m’é capitòu de fâ... E za chò-u sò che se vaddo a dormî de dòppo disnâ pöi m’îso mez’inbarlughîo co-â testa ch’a me fa mâ. Tant’è...

Franco Bampi