Segónda «Méssa Zenéize»

Fèsta do Santoâio

Santoâio N.S. da Vitöia
Méssa in latìn
Traduçión zenéize de præ Lusciàndro Carbón, Frànco Bànpi e Marîa Viétz

Prìmma letûa

[ Atti 34, 21-27 ]
Da-i Àtti di Apòstoli

²¹Inte quéllo ténpo, Pòulo e Bàrnaba són tornæ a Lìstra, Icònio e Antiòchia, ²²dàndo fòrsa a l'ànimo di discépoli ezortàndoli a restâ inta fêde dæto che bezéugna che noiâtri intrémmo into Régno de Dîo attravèrso bén bén do tribolâ. ²³Ordinæ quìndi pe loiâtri prævi pe ògni gêxa, dòppo avéi pregòu con zazuìn, l'àn afidæ a-o Segnô, into quæ avéivan credûo. ²⁴E, pasâ a Pisìdia, són arivæ in Panfìlia, ²⁵e dòppo avéi predicòu a Paròlla a Pèrge, són chinæ a Attàlia. De de la àn navegòu scìnn-a a Antiòchia dôve êan stæti afidæ a-a gràçia de Dîo pe l'òpera che àn portòu a compiménto. ²⁷Arivæ e riunîa a gêxa, àn anonçiòu tùtto quéllo che Dîo o l'à fæto pe mêzo de loiâtri e cómme o l’à avèrto a pòrta da fêde a-e naçioìn.

Paròlla de Dîo
Rendémmo gràçie a Dîo

Sàlmo responsoriâle

[ Salmo 144 ]

Ritornéllo: Benediö o teu nómme pe de lóngo, òh Segnô.

⁸Pìn de gràçia e de bontæ o l'é o Segnô,
lénto a-a ràggia e grànde inta misericòrdia.
⁹Bón o l'é o Segnô vèrso tùtti,
e o seu amô pe tùtte e seu creatûe.
Ritornéllo: Benediö o teu nómme pe de lóngo, òh Segnô.

¹⁰Che te löde, òh Segnô, tùtte e teu creatûe
e che tùtti i teu fedêli te benedìgan.
¹¹Che dàgan a glòria do teu régno
e che dìgan da teu poténsa.
Ritornéllo: Benediö o teu nómme pe de lóngo, òh Segnô.

¹²Che fàsan conósce a tùtti i fìggi de l'òmmo e seu poténse
e a spléndida glòria do seu régno.
¹³O teu régno o l'é o régno de tùtti i sécoli
e o teu domìnio pe tùtte e generaçioìn de generaçioìn.
Ritornéllo: Benediö o teu nómme pe de lóngo, òh Segnô.

Segónda letûa

[ Ap 21, 1-5 ]
Da-o Lìbbro de l'Apocalìsse de Sàn Gioàn Apòstolo

¹Mi, Gioan, ò visto un çê nêuvo e 'na tæra nêuva. De fæti o prìmmo çê e a prìmma tæra êan sparîi e o mâ o no gh’êa ciù. ²E ò vìsto ànche a çitæ sànta da nêuva Geruzalèmme chinâ da-o çê, da Dîo, prónta cómme 'na spozâ agibâ pe-o seu spozòu. ³E ò sentîo 'na gràn vôxe da-o seu tröno ch'a dîva: «Écco a ténda de Dîo co-i òmmi! E Lê o metiâ a ténda tra de loiâtri e loiâtri saiàn o seu pòpolo e Lê o saiâ o "Dîo-con-loiâtri". ⁴E o ghe sciughiâ tùtte e lâgrime da-i éuggi e a mòrte a no saiâ ciù, e no ghe saiâ ciù ne lùtto, ne laménto, ne fadîga, perché e cöse de prìmma són pasæ». ⁵E quéllo ch'o l'êa asetòu in sciô tröno o l'à dîto: «Écco mi fàsso néuve tùtte e cöse».

Paròlla de Dîo
Rendémmo gràçie a Dîo

Alelóia

Alelóia, Alelóia

Ve dàggo un comandaménto néuvo, dîxe o Segnô: amæve un con l'âtro cómme mi v’ò amòu.

Vangêlo

[ Gv 13, 31-33.34-35 ]
Letûa da-o Vangêlo segóndo Gioàn

Glòria a ti, òh Segnô.

³¹Quànde Giùdda o l'é sciortîo, Gexù o dîxe: «Òua o fìggio de l'òmmo o l'é stæto glorificòu e Dîo ascì o l'é stæto glorificòu in lê. ³²Se Dîo o l'é stæto glorificòu pe mêzo de lê, Dîo ascì, da pàrte seu, òu glorifichiâ e òu glorifichiâ sùbito. ³³Figeu, ancón pe pöco són con voiâtri; voî me çerchiéi ma, cómme ò za dîto a-i Giudêi, òua òu dìggo a voiâtri, dóve vàddo mi, voiâtri no poéi vegnî. ³⁴Ve dàggo un comandaménto néuvo: amæve un con l'âtro cómme mi v’ò amòu, coscì amæve ànche voiâtri un con l'âtro. ³⁵Da sta cösa chi tùtti saviàn che séi mæ discépoli, se aviéi amô un con l'âtro».

Paròlla do Segnô
Löde a ti, òh Cristo.

Intençioìn de preghêa

Celebrànte: Fræ, a giöia da Pàsqua a l'é o frûto de l'òfèrta do sacrifìçio de Gexù, coronâ da-a seu resureçión. Domandémmo insémme a-o Segnô 'na ciù profónda penetraçión de sto mistêio de sarvéssa:
(Ritornéllo) Inlùmina a nòstra vìtta, òh Segnô.

1. Pe-a Gêxa, perché inte tùtte e pàrte do móndo a pòsse, in libertæ, spalancâ a tùtti quélli che no conóscian Cristo a pòrta da fêde.
   (Ritornéllo) Inlùmina a nòstra vìtta, òh Segnô.
2. Pe tùtti i òmmi, perché capìscian che sôlo Dîo o peu fâ nêuve tùtte e cöse, trasformàndo e pénn-e e e soferénse, co-a poténsa do seu amô.
   (Ritornéllo) Inlùmina a nòstra vìtta, òh Segnô.
3. Perché chi govèrna e nòstre tære e e nòstre génti de Ligùria o no s'ascòrde mâi da nòstra Stöia, de nòstre tradiçioìn, da nòstra léngoa e o l'àgge a fòrsa e a voentæ de fâne ritornâ gréndi cómme sémmo stæti pe tànti e tànti sécoli.
   (Ritornéllo) Inlùmina a nòstra vìtta, òh Segnô.
4. Perché Zêna, Çitæ de Marîa Santìscima, e a Ligùria, mìsse sótta a proteçión da Madònna Regìnn-a de Zêna, sàcian meritâse st'ònô travagiàndo pò-u bén de tùtti inta testimoniànsa di valoî do Vangêlo.
   (Ritornéllo) Inlùmina a nòstra vìtta, òh Segnô.
5. Perché quésto Santoäio, tiòu sciù in scê sta çìmma in memöia da prodigiôza vitöia do dêxe de màzzo do mìlle seiçénto vintiçìnque (10-5-1625), de pöchi vilén, ispiræ da-o Çê, cóntra tantìscimi invasoî, o ségge de lóngo pe-e tære de Ligùria a lûxe pe-a vitöia cóntra i mâ do móndo.
   (Ritornéllo) Inlùmina a nòstra vìtta, òh Segnô.

Celebrànte: Poæ mizericordiôzo e fedêle, concêdi a noiâtri o dón pasquâle do teu Spìrito pe poéi, pe quéllo che dipénde da noiâtri, colaborâ a-a costruçión de un móndo rinovòu inte l'amô.

Pe Cristo nòstro Segnô
Àmen