|
Ei mai sentïo parlâ da "rebellëa"? I ciû ansien, intendo dî quelli che han a mae etae o de ciû, magari l'avian anche vista, i ätri, i zoeni, penso de no. In sciö vocabolaio "Zeneize-Italian" do Casassa se lëze: «REBELLËA: Carrozza mal in arnese che per disprezzo dicesi anche Treggia». Ma in te questo caxo, l'é mëgio consciderâ o verbo REBELLÂ dove, sempre o Casassa o dixe: «Tirarsi addietro alcuna (in to senso de "ûnn-a") cosa senza sollevarla da terra». Ebben, i tranvai elettrici de votte ëan composti da ûnna motrice e da ûn remorchio. Noiätri semmo abituae a vedde i tranvai (a Zena òua no ghe n'é ciû, ma in ätre çittae ghe n'é ancon) che pan treni de lûsso; quella votta e motrici paivan, squadrae comm'ëan, scatoe da scarpe con quattro reue de sotta, con due ciattaforme ûnn-a davanti e ûnn-a derrê averte a tutti i venti. O guidatô ch'o se ciammava "manovratô", o stava sempre in pê in sce ûnn-a de dïte ciattaforme: pe lê o sedile o no gh'ëa (ghe l'han misso anni doppo), davanti o gh'aveiva o veddro e in basso, ûnna maneggia a manovella ch'o faxeiva giâ in senso orizzontale e che a l'aveiva eutto scatti: o primmo o corrispondeiva a-a velocitae minima, quella pe smeuve a carrossa, e poi ciû sciû i ätri finn-a a l'urtimo, o ciû veloce, tanto che quarchedun ch'o l'aveiva sprescia o dixeiva rivolto a-o manovratô: «Meistro, daeghe l'eutto, pe piaxei!» D'inverno faxeiva freido a quello posto lì perché, comm'ho dïto, o l'ëa tûtto averto a-i lati; i passeggê, invece, stavan drento perché gh'ëan due porte scorrevoli comme quelle di scompartimenti in ti treni coscì che separavan e ciattaforme da-a parte centrale da scatoa ch'a se poeiva serrâ. Drento a gente a s'assettava in sce due banche misse pe-o longo con o setto e o schienale a strisce de legno comme e banchinn-e di giardin coscì che se giava a schenn-a a-i barconetti co-i veddri che davan in sciä stradda; i figgieu piccin se ghe inzenoggiavan giae in feua e co-o naso contra a-o veddro pe vedde mëgio a stradda. Chi voeiva chinâ o ciammava a fermata tiando 'na striscia de cheuio che a ghe passava de d'äto a-a testa, sostegnûa da di anelli e che a sciortiva feua in sciä ciattaforma dove gh'ëa o manovratô: quella a fava mesciâ ûn martelletto ch'o batteiva contro 'na campannetta: ûn DIN! voeiva di FERMITE, duî DIN DIN! scignificava PARTI!. O segnale de ripartî o dava o bigliettäio perché a corsa a se pagava in vettûa. Pe avvertî quarche personn-a o qualche carrettê (allôa gh'ëa pochi camion e e merçe se portavan ancon co-i cäri tiae da-i cavalli) che magari ëan distraeti e traversavan i binari sensa fa caxo a quello che ghe poeiva succede, o manovratô o dava ûnna pestâ in sce ûn pomello-pedale ch'o l'aveiva vixin a-i pê e ch'o fava sûnnâ ûnna campann-a missa sott'a-o pavimento do tran: DEN! DEN! a fava. Òua, d'inverno pe-a gente andava ben coscì, ma d'estae ghe fava ûn cädo dell'assidero là drento, e allôa ecco a "rebellëa". Questa carrossa sensa motore a vegniva tiâ da-o tranvai che, pe fâ ciû fïto, se diva solo "tran". A no gh'aveiva teito e manco i barconetti: a l'ëa tûtta averta, solo gh'ëan in scï fianchi de aste verticali de faero che ûn tiâ in sciö quae gh'ëa steisa 'na teia verde (uso teito) che a pendeiva a-i lati co-o farbalà. E ben: l'ëa bello ësighe in çimma: se ghe stava ben a-o fresco, riparae da-o sô; ma l'ëa anche bello pe chi l'ëa pe-a stradda vedde passâ questa cösa ch'a fava bello vedde e allegria. Pe solito a rebellëa a l'ëa impiegä in scï percorsci lunghi, saieiva di, presempio, da Moassann-a ò da Prou finn-a a Caricamento, ò da Vötri, da Pontedeximo, da Nervi... pe arriva in çittae. O l'é ûn bello ricordo de-a Zena ch'a s'é persa in ti anni. Oua semmo marotti de sprescia, de velocitae. Capiscio: o progresso o l'ha e sò esigense e se côre, se côre..., ma pä che no aggimmo ciû no solo o tempo de amiäse in gïo, ma anche che aggimmo perso a quae e o piaxei de godïse e cöse belle. O fòscia, o ma, o saiä o rincianze o tempo de quand'ëo solo un figgieu de eutto-dex’anni. [ Inderrê ] |
