Boschi de-a mae Ligûria
che a seia,
quande o sô o spara lamme rosse
e o çê o s'imbrûnn-a,
v'ascondei
in to mistero do scûo
che fra e ramme e e feugge
di vostri erboi o nasce,
seggei beneiti.
Cian cianin 'n'äia viovetta
a ve fascia e a mi,
che v'ammïo ammiòu,
me chinn-a drento
o gran silensio do çê.
L'incanto do manto
ch'o ve fa ëse coverta a-e collinn-e
che in distansa
son ûnn-a doppo l'ätra,
v'assomeggia a-e schenn-e
de 'na mandra de pegoe addormïe.
Drento de voiätri s'arrecovia a vitta:
o piâ de 'n nïo in sce 'n forchin aerto,
o remesciâ de brûschi a-o scäso de 'n'erboo,
o parpellâ de lûmetti in xeuo
me contan 'na foua sensa parolle
ch'a s'esprimme
co-e voxi eterne de-a natûa.

Antonio Fioravanti