Veuggio provâ a esprimme ûn concetto
che o pä, armen a mi, existenziale.
Creddei che no o diggo pe solo diletto
e saveilo, sacceilo, o no l'é guaei banale.

Scibben che magara a voî o no ve importa
pe dîve sto faeto vorrieva insciste
proviö pe 'n momento a arvî quella porta

donde nisciûn pensciëo o l'existe.
No l'é, comme a pä, ûnna cösa contorta
ma de quelle coscì ciaee che de ciû no s'en viste:

manco o nostro sô o l'é tanto lûxente.
Porrieilo scrovî a-o momento che o saviei
o faeto o ve parriä coscì evidente
che voî pe no cianze, speremmo, riddiei.

Allôa... E sûbito voî «do lô a moggê»
«Ma no diggo a lôa, a cagna cattïa»
«Cose ti dixi allantô?» me diei.

Ve spiego o concetto, gïa che te regïa
no staeve a sciätâ e stei assetae
primma che o fî o me scappe via.

No sô comme dîlo: se sgreuzzo ò se ben,
passâ da camallo ò da letteròu,
magara da mi, che ciû me conven.
Me fasso coraggio e piggio do sciòu.

Allôa semmo zunti, cariscimi amixi,
a l'ôoa che d'allôa voiätri aspëttae.
Ma no arraggiaeve, no sei coscì grixi

che mi questa votta ve o diggo davvei!
L'é vëa, se sa, l'é tempo de crixi
ma ciappâlo in to cû o no fa mai piaxei.

Filippo Noceti