T'ae mai sentïo l'öchin criâ in to vento,
co-o becco averto, e äe desteise, larghe,
äto lasciù in to çê, con l' euggio attento
a l’ondezzâ do mâ?...

In te l'öa malincònica da seja
anche o respïo da taera o l'é sospeiso.
O sô o parpella comme 'na candeja
ch'a se consumma cian cianin...

Poi tutt'assemme un sciäto. In te 'n momento
l'öchin o l'é in sciô mâ, a o fî de l'onda.
o s'asbrïa in te l'aegua, o röba un pescio
e o se ïsa in to çê.

Povëo pescetto! Ti nûavi adäxo
e oua t'han streppòu da o teu elemento,
finïo in bocca a 'n'öxello sconosciûo!

Anche pe mì vegniä l'öchin. L'aspëto,
comm'o fïse 'n'amigo zà annunçiòu,
ghe diö: Son pronto a fâ con ti l'ûrtimo viägio,
in ta neutte ciù scûa m'appaxentiö.

Giovanni Murchio