L'erbo de nespoe, o figo, o limonetto,
a stalla con trae vacche, o töu Baciccia,
a terrassa da Mari co-o cagnetto
ch'o bajava de longo, i giäsemin
ciantae in ti vasi comme o baxaicò...

L'ödô de l'erba luisa, o fen, a paggia,
o magniscarco pe ferrâ i cavalli,
l'ammolitta, o strassê, l'òmmo di paegui,
a tromba de latton do rumentâ...

Da figgeu se zugava a scondilô,
co-e baedinn-e, co-i tappi de gazzeu,
poi guaere co-e cannette e co-i risseu,
e zenogge spellae, bòrli e negroin...

Oua semmo cresciûi, no gh'è ciù ninte
de queste còse vëge, gh'é o progresso,
o nòstro mondo o l'è vegnûo piccin,
semmo tutti in ta rae, comme naselli...

...ma semmo soli, comme loî sarvaeghi...

Giovanni Murchio