A Zena, che a memöia a no me falle,
da ûn pö de tempo va de modda e balle.

Balle in scia stampa, balle in sci giornali,
balle tra i Assessori Comunali.

Balle pe drïto, balle pe traverso,
perde chi guägna, guägna chi l’ha perso.

E i tiföxi do Doia e do Griffon
stan de longo co-a testa into ballon.

Stemmo attenti, Zeneixi, ammaniman
chi fa na balla finn-a o Renzo Cian,

che in mëzo a-o porto, e queste non son balle,
o te ghe mette ûn mûggio de farfalle.

Ö semmo, senza anâ tanto inderê,
che o ligaballe o l’ea ûn bello mestê,

ma quelle (non son miga ûn belinon)
no ean de veddro, ean balle de cotton!

A questo punto ghe veu 'na risposta;
stae un po' a sentîla questa mae proposta:

pe rende un po' ciù masccio o porto antigo,
mettemmo un pâ de balle sotta a-o Bigo!

Giovanni Murchio