I Rusci han imparôu a fâ a vodka da noiâtri

Da quarche tempo in sa, in te vedrinn-e de quelli che vendan licôri, se vedde de righe de bottigge con l'etichetta scrïta in ruscio e con di prexi, figgieu cäi, da fâ drissâ i cavelli. Anche chi no l'è bon de leze l'alfabeto cirillico o l'accapisce de cose se tratta: a l'è a vodka. Ebben: queste bottigge e queste etichette a mì, me fan vegnî in chêu o rie. Intendemose, miga che a vodka, a mì, solo a veddila, a me mette de bon umô. L'ho bevûa in sciö posto, saiâ chinz'anni fa, brutti momenti, e no me vegne ciù in mente che effetto a m'aêse faeto. Quello che me rammento ben l'è che a mì, che son de stômago loccio, mâ a no me n'a faeto. O bon umô o me vegne aöa, pensando che e gente se schissan o naso in te vedrinn-e a ammiâ o scrîto ruscio «BODKA» e pochi, o nisciun, san che a-i Rusci a fa a vodka ghe l'han impreizo i Zeneixi. A l'è propio coscì: gh'è poco da spalancâ i êuggi. O lettô che o se credde che ghe vêugge fâ beive d'o grosso (de suppe, s'intende, no da vodka) o me fasse o piaxei de vegnîme un pô appreuvo. Començiô con unn-a data precisa, pe moddo che se quarchedun o vêu andâ a remesciâ do papé vegio in ti archivi o pêu vedde se ghe conto de micce. Dunca o 25 de luggio do 1339 o Capitagno do Popolo de Zena o mandava in gio in sciä spallea de Quarto de guardie pe avvisâ i paisen de no taggiâ manco un rappo de quell'uga che a mêujava lasciù, uga famosa in tutto o Levante e in tutto o Ponente perché ghe sciortiva un vin speciale, servìo in scë toue de Granata e de Damasco. O lettô sensa pasiensa o l'aspëte un pittìn: o sò mi ascì che a vodka a non se fa con l'uga. O Capitagno do Popolo chi o gh'intra solo pe dimostrâ che seiçent'anni fa Zena a l'ea unn-a taera da vin, e de vin da emiri, da pascià e da re.

A no l'e frûta nêuva che a quelli tempi i Zeneixi ean conosciui ciù che a spassuia, comme naveganti e traffeganti («Genuensis ergo mercator» ) dae Baleari ao Mâ Neigro. Scinn-a Raimondo Lullo, ch'o l'ea ûn fratte de quelli che ammiavan ciù in çê che in taera, da bon catalan o i conosceiva ben. O l'e propio lê che in te unn-a sò memoja o spiega e mainee de fâ i licôri e o ghe mette anche quella de fâli con a fermentasion do gran. Segondo lê i primmi ch'aveivan dêuviou questo scistema ean staeti i Arabi ma i primmi che l'aveivan impreizo da lô ean staeti i Zeneixi. Questi, sensa pagâ o brevetto, trovandose in sc'e coste du Mâ Neigro a contatto con quarche commerciante slavo, foscia pe onze e rôe de quarche affare ch'o stentava a giâ comme voeivan lô gh'han faeto assazzâ o licôre neuvo, imparou dai Arabi. Chissà che successo! Ma se peu zugâ che pe dâghe a riçetta se saian faeti impî e stacche de dinae. Do resto un scritô ruscio, o Gerevzov, o a conta ao maeximo moddo. Pe chi no saese, «vodka», in ruscio, vêu dî «aeguetta»: unn-a prêuva de ciù che i Rusci no aveivan unn-a parolla speciale pe mensunâ i alcolici.

Quello che l'e seguo l'e che i Zeneixi han bevuo a vodka primma di Rusci.

EDILIO FRASSONI

[ Inderrê ]