|
Tanti amixi e conoscenti han espresso o dexidëio de iniziâse ä pesca do mûzao, perchè
o l'è un genere de pesca differente da tutti i âtri e vedendola praticâ ä trêuvan ciù
divertente, perchè effettivamente a l'impegna de ciù o pescatô Chi l'è appascionôu a-o san e seduxente sport da pesca, anche s'ô no l'ha mai pescôu ô mûzao, o no deve imprescionâse s'o s'accorziâ che no l'è poi tanto façile, anzi, e questo o dovieiva invêuggiali, perchè in fondo a ogni ûn de noiâtri gh'è a stessa ambiziôn che l'è fra i cacciôei, che van orgogliosi de poei mostrâ o sò carnê con de pernixi: noiâtri con di belli mûzai. No se pêu fiâse do caxo pe pescâ sti pesci: ö «cannon da mûzai» (mugginista) o sceglie sempre attentamente o posto pe-a sò caccia e s'o troviâ che o posto scelto o l'è soddisfacente, o continuiâ sempre a brûmmezzâ e a pescâ lì. In Liguria e in ta nostra bella Zena, gh'è de magnifiche schêuggiee con di dôçi declivi; mêgio ancon se in te sti posti se gh'attrêuva ûn riâ d'aegua dôçe: o saieiva l'ideale, perchè a-o mûzao ghe piaxe l'aegua ûn po' salmastra e o se ghe ferma cùû voentèa. De mûzai ghe n'è diverse qualitae. Sti pesci han a testa larga e sciaccâ, l'avertûa da bocca strèita e ogni ganascia a l'è armâ de denti picciniscimi; a lengua a l'è rustega, o figaeto grosso, o stêumago piccin, carnoso e coverto da unn-a membrann-a rûgosa, façile a destaccâse. E qualitae di mûzai son: mûzao de l'öu, mûzao gangâ, mûzao massön, mûzao neigro e ä fin mûzao luxento o de l'êuio. Pe aöa me limitiô a parlâve di scciummarolli, oscïa i luxenti, che son quelli che viägian e mangian quaexi a galla. Pe sta pesca i mëgio meixi son da lûggio a ottôbre, perchè l'aegua do mâ a l'è ciû câda e l'appetitto di mûzai ottimo. E giornae ciù adatte son quande o mâ o l'è appenn-a bôllezzûmme, l'aegua a l'è gassâ, gh'è pochiscimo vento, o çê o l'è coverto e a marèa a l'è in aumento. L'ideale pe a pesca in to nostro golfo o l'è ûn leggero sciöco, con i atri venti e probabilitae diminuiscian. L'è conseggiabile êse in pochi a inscidiâ sto pescio fûrbiscimo e diffidente, che pâ o l'agge çento êuggi: a raxôn a l'è che in pochi s'asconde mëgio. Evitae de portâ röba gianca e vistösa, de stâ in pê e d'avèi con voiâtri qualchedûn che ghe sâte i scrìpixi de fâ di lanci. Regolae i gallezzanti tutti con o maeximo pescaggio, usae a maexima esca, brûmmezzae de quando in quando e avièi coscì a tîo de vostre canne i mûzôuti (mugginotti). E öe ciù bonn-e son quelle dô primmo mattin o quelle da seja primma do tramonto. Un bon brûmmezzo o l'è: pan gianco (no a l'êuio), pesci decomposti e fôrmaggio guasto faeto primma smêuggiâ in te ûn recipiente ben serrôu. Ve raccomando ben serrôu perchè quande saiei a-o mâ e l'arviei... Pe i deboli de stêumago o saiâ ûn disastro, ma anche pe-i mûzai, perchè con quell'ödô vegniàn, sotto riva e l'appetitto o ghe aumentiâ. O brûmmezzo o và cacciôu in mâ a poco a poco con unn-a cassa (mestolo) e poscibilmente solo a parte liquida. Se a corrente a tîa a-o largo, stae segûi che doppo unn-a mez'oëta veddiei arrivâ i primmi mûzôuti. Se o fondale da schêuggiea ch'haei scelto o no l'è troppo fondo, oltre a-i mûzai poiei pescâ anche di sâgai, de sarpe e de êuggê, ecc. Comme esca, a mëgio a l'è a sardenn-a fresca preparâ primma e cioè: spellâ doppo avèila sventrâ e avèighe levôu a testa e pulîa ben de parti marron-scûo. Doviâ restaghe quattro fiêti belli ciaei in scï quae ghe spanteghiei in çimma ûn po' de sâ fin, ch'o fa ciù redena l'esca. 'N'atra esca eccellente a l'è o paston ch'o s'ottegne mettendo insemme: môula de pan gianco non a l'êuio, formaggio gorgonzola butirôso (solo a parte gianca) e pan gianco grattôu. Doppo avèi esaminôu i preparativi preliminari, passiô ä fase conclûsciva de questa pesca. Primma de tutto armae a vostra canna con 'na lensa de nailon do numero 0,15 e-e due barbette do numero 0,12, montandoghe duî ammi a spillo dö numero 14 (fae ben attenziôn che e barbette seggian ûnn-a ciù lunga dell'atra, pe evitâ che i bôccoin se ingarbûggian, in to quae caxo o mûzao o n'abbocca) applicando ûn nattello neigro e ûn po' de ciôngio comme peizo. Se se poêse pescâ sensa ciôngio i risultati saieivan anche ciù boin: o l'è troppo asperto o mûzao pe lasciâse ingannâ. Manovrae a vostra canna comme s'a fusse 'na frusta, rimorchiae o gallezzante sempre contro corrente e no perdeilo mai de vista perchè, pâ imposcibile, ma se giae un momento l'êuggio, quello bônaegia d'ûn mûzao o l'abbocca subito. RENATO VECCHI * * * Se dessan o Premio Nobel de brutte figue, chi a Zena qualchedun ghe l'emmo.[ Inderrê ] |
sportivo.