|
O l'ha faeto rïe mezo mõndoSe voesci vedde Luigi Anselmi, no andaelo a çercâ a casa e tantociù de nêutte. Pe incontrâlo ve basta aspëtâ che e stradde seggian deserte e mettive in galleria Mazzini. Quande a gente a vâ a letto, o magari quando a dorme zà, ô «Giggio» ô sciorte a passeggiâ pe-i carruggi, pe Zena deserta, squaexi pe gödîse, da solo e in paxe, e cose belle che ô traffego de giorno o l'asconde. A veddilo comportâse comme un guardian notturno porriesci ciammalo misantropo. Mi invece ô ciammo poeta. Perchè sò che drento de lê, - scibben o segge rustego, serio, spesso permaloso - gh'è o chêu d'ûn artista ch'o sâ vedde, capî e spiegâ i sentimenti do popolo da o quae o l'è nasciûo. E segge ch'o ve fasse cianze o ch'o ve fasse rîe, o «Giggio» o lasciâ sempre in voiatri a convinziôn commovente d'avei dîto quarcosa de logico e de vêo. Questo, de ricordâ ai zeneixi e cose umili e pratiche da nostra vitta de tutti i giorni e de saveighe rîe in çimma, a l'è un po' a ciave do successo de l'Anselmi. Ommo istintivo e geniale, se pêu dî ch'o s'è faeto da solo; basandose in sciä sò pasciôn, in sciö sò estro e in sciö spirito de osservaziôn: l'osservaziôn anche d'unn-a stradda de nêutte, d'un mainâ ciucco, d'ûn spassin ch'o rasccia ûn manifesto.
Nasciûo a-e Grazie, çinquantêutto anni fa, figgio de zeneixi, Luigi Anselmi o l'ha faeto anche o portuale. Ste origini, che g'han insegnôu a leze in ta parte ciù intima da Zena modesta ma vera, son staete a sò fortunn-a. Trent'anni fa, incontrando Marzari in t'a bottega do «Rêua», o s'è accorto che quarchedun trovava spiritose e sò scenette e ch'o-e voeiva reçitâ. Da quello momento o successo o l'è arrivôu de botto. Son vegnûi i dischi, e parodie pe-e compagnie de rivista, e commedie pe-a radio, e canzôin che han faeto vegnî o magon a tanta gente. ' E anche, in to 1954, a medaggia d'öu do Scindico Pertusio pe premiâ a sò valorosa attivitae. Se pêu dî che anchêu no ghe segge zeneize ch'o no l'agge mai sentîo un disco creôu da Luigi Anselmi e inciso da Giuseppe Marzari; e bonn-a parte de quelli ch'o l'ha faeto rîe, o disco l'han anche accattôu. In t'o trenteximo da sô attivitae Luigi Anselmi proximamente o pubblichiâ unn-a raccolta di sò maggiori successi fonografici sperando de fâ cosa gradiâ a tutti i zeneixi che l'han sempre seguîo. A raccolta a l'aviâ pe titolo: «ZENA VISTA COSCÌ». Portae da-i emigranti, conservae da-i mainê, i dischi de l'Anselmi se son sparsci pe-o mondo; son in qualunque posto se intende a lengua zeneize; pâ ch'aggian a calamitta perchè fan fermâ sempre a gente davanti a-e bôtteghe de radio. O baritono Taddei o l'ha contribuîo a fâ conosce unn-a bella, foscia a ciù nostalgica canzôn de l'Anselmi: «Saluta Zena», cantandola a tutti i zeneixi ch'o l'ha incontrôu pe-o mondo. O l'ha çercôu de rende meno doloroso o vêuo lasciôu da Mario Cappello, ch'o l'aveiva in repertorio. No l'è façile scordase a sò grande interpretaziôn. Sotto a luxe bleu di riflettori, tegnindo in man o mandillo in segno de salûo, o cantava o ritornello: «Ciao, salutime un po' Zena, - Portoia, a Maenn-a, o Meu! - Ciao, salutime un po' Zena, - che l'ho sempre chì in t'o chêu!». Luigi Anselmi, scibben o segge popolare, scibben o l'agge avûo grandi successi, o l'e staeto misso un po' in disparte in questi ultimi tempi e no se ne capisce a raxôn. Tanto ciù ch'o no l'ha solo travaggiôu pe sò conto ma ch'o l'ha anche favorîo a carriera de vari artisti da scena leggera, començando da o sò amigo Tino Scotti. Noiatri conscideremmo o «Giggio» comme un di rappresentanti ciù esprescivi do nostro carattere: o no l'è ommo de lettere ma o l'arve con sinceritae o sò animo ai atri. E i atri dimostran de capîlo. De Luigi Anselmi ve presentemmo chì de seguito, savendo de fâve divertî, «A Storia do pesto», a filastrocca «Gran Turismo » e a comica «A Zena nel 1992». Stâ a voiâtri giudicâ. [ Inderrê ] |
