Avendo in casa
ûn macchinario,
ò "Elettrica saldatrice"
(comme se dixe)
me vegnûo coae
de fâme 'na scultûa
con faeri de sfròuxo
e ûn po' de saldatûa.
Ho piggiòu
lamëe, tòcchi de tûbbo,
faero a elle, a ti,
a zetta e angolare,
ascì quaddro, a "U"
e riççi de torniòu.
L'ho missi insemme
coscì all'abbrettio
coscì comme vegnivan.
Cöse n'é sciortïo
No v'òu sò dî.
Faeto sta che,
da chi l'ha visto,
ho sentïo coscì:
«Ma mïte chì,
o l'è 'n capolavoro!
O me piaxe indavvei!
Mia che composission!»
«Mi o me pä ch'o segge
un'erboo..., no...,
ciûttosto 'na pennolla
de quelle intralicciae».
«Pe' mi invece o l'é
ûn veliero co-e veie
imbroggiae co-i tersaieu».
«Ma semmo sciolli?... Figgieu
o l'é ûn ciantê
con ûn barco in sciö scallo!»
E idee son tante:
chi ghe vedde ûn camallo,
chi 'na mancinn-a,
ûn pontezzo, 'na tôre,
un sbotto de fantaxïa...
Tûtti dixan, se dan da fâ,
tûtti tian a indovinâ.
Ma nisciûn gh'a fa a capî.
E, mae vergheugna,
manco mi.

Antonio Fioravanti