Te saio, Zena,
çittae d'incanto
che ti m'ae visto nasce
e cresce e andâ sordatto!
Òua son vegio, ma ancon
veuggio cantate a mae canson.
T'ë in sciä maenn-a steisa,
in scï monti arrampinnä
e in te vallae, finn-a in fondo,
sprofondä.
'N'ätra paegia, o mae çittae,
a no l'existe:
solo ti ti gh'é,
solo ti in mae veitae.
Ti sae de sâ,
de cornabûggia,
de baxaicò
de spûssa de gatti,
de profûmmo di caroggi,
de sciòu d'antigo e de moderno,
dell'ombra de creuse,
do cô do mâ,
do scûo de-a misëia,
do sciato di dinae.
Ma anche ti spandi in gïo
ödô de caitae.
No sò ciû cöse dî...
Ah, scì ti me piaxi,
ti me piaxi coscì.
. . . . . . . . . .
E, se no saiä in mëgio,
no cangiâ, se ti ghe a fae.

Antonio Fioravanti