Me sovven de quand'ëo bagarillo
e a primma votta
ch'ho sentïo cantâ
ûn grillo.
L'ëa de seia
lasciû in Granaieu:
ëo da ûn mae barba
ch'o l'aveiva ûn beu
zû in ta stalla.
De lì sciortivo
co-a mae baccann-a
pe ritornâ sciû in cà.
Se semmo fermae incantae,
mi e mae mamà
a sta voxe piccinn-a e sottî
d'intra l'erba:
"cri-cri... cri-cri..."
L'ho sentïo, l'ho çercòu,
ma no l'ho visto
arescoso comm'o l'ëa
tra i fî d'erba
ò intanòu?
Cöse vëgie,
in là de anni...
Me restä de quella votta
l'imprescion chì drento a-o cheu:
o silensio tûtt'in gïo,
o gran çê co-o ciaeo de lûnn-a,
l'infinïo mâ là in fondo
e sta voxe piccininn-a
ch'a se fava ben sentî
con o sò
"cri-cri... cri-cri...".
Paiva a mi a voesse dî:
«Anche se megnûo son
chì existo anche mi!»
Quello grillo...!
Quanti anni
da quandëo bagarillo!

Antonio Fioravanti