I cabanelli son comme di fauni, di gnomi, ma ciû piccin, tanto piccin che mai nisciûn o l'ha mai visti. Vivan inte de çittae sott'a-e feuggie di boschi e laouan neutte e giorno. I sciensiati de tutto o mondo han faeto riçerche, ma sensa risultati. Se sa solo che ghe son, che existan veramente.

Se sa, ormai da çento e çento anni, che questi cabanelli han de fabbriche de seunno: de giorno laouan a fâlo e de neutte ognidûn o se carega un sacco de seunno e vegnan cian cianin a scaregateli in sce-e parpelle di euggi. E in riga, silensiosi, ordinae, sitti sitti, scaregan sacchi e sacchi, finché e parpelle se fan pesanti e te se saeran i euggi. Coscì ti dormi seunni tranquilli e sereni.

Veuggighe ben a-i cabanelli che i sciensiati non attreuan ma ghe son, ghe son.

Carlo Tardito