A-a mattin fïto,
in sciä caladda,
gh'eivimo in tanti.
E in to baillamme
di camalli,
i crïi di caporali,
stavimo a aspëtâ
che careghessan o cäro.
L'ëa bello scangiâ
duî discorsci co-i colleghi,
tra 'na bocconâ de brenno
e l'ätra,
e vedde quei ommi
che se davan da fâ
pe scaregâ ò caregâ
i vapori.
Vedde e mancinn-e
con e bragae de sacchi
che andavan sciû e zû
sensa riposo.

Poi o l'arrivava o padron,
e con a man in ta cavezza,
o n'avvertiva che
o carego o l'ëa faeto:
l'ëa l'oa d'andâ.
E se partiva.

Co-o cäro pin
attraversâ a çittae
o l'ëa un gran giamin,
co-i zeuccai
che scûggiavan in sce-e lastre
ò in sce-e colisse do tranvai.
Alloa o strafunsin
o te sccioccava
in mëzo a-e oegie,
o te dava forza,
o te spunciava
senza toccâte
Dio n'avarde!
O mae padron
o no m'ha mai pessigòu;
o criava, scì,
o tiava,
o giastemmava,
ma o l'ha sempre
capïo a mae fadiga.
A chi stava a vedde
paiva foscia
ch'o me voëse mä,
ch'o me frûstesse.
Ma quande
s'arrivava,
tanto che scaregavan,
in to sacco do brenno
ghe trovava due carrubbe.

Eh scì!
O padron o sa,
o se arregorda
cöse emmo passòu.
O se arregorda
quande i battosi
ne corrivan appreuo
pe sätâ in sciö cäro
e lê, co-a scurriâ,
o i mandava via,
pe-a puïa che se fessan mä.

E quelli che
accuggeivan i nostri scarti?
Anche quelli
servivan a fâ
ciû profummòu
o baxaicò
e o romanin
missi in sciö barcon.

Oua semmo
arrestae
in trei o quattro,
vëgi e stanchi
e senza laòu.
Oua gh'é i autotreni
che te impan e naixe
de fûmme,
e macchine che han premûa.
No gh'é ciû
e colisse do tranvai,
no gh'é ciû e lastre.
Oua gh'é l'asfalto
e ti ghe metti troppo
a fâ o trasporto.

A-a seia, in ta stalla,
penso ai tempi passae:
a-o fen fresco,
a-e carrubbe,
a-o profûmmo de mâ,
a-o romanin in sciö
barcon.
Oua, in ta veggiaia,
anche o padron o
s'accontenta,
o cäro squaexi veuo,
anemmo ciû cianin.
Pe noiatri no ghe n'é
premûa.
A premûa
l'ha
inventä l'ommo
e o n'ha scartòu.
Passiensa.
Foscia
l'é mëgio coscì.

O cavallo do porto.

Carlo Tardito