In sce Zena gh'é pösä
ûnn-a grossa lûmassa,
a sciorte, a striscia, a torna
dentro a sò carcassa;
o brûtto o l'é
che co-o sò bavon
a mette angoscia
a-o steumago ciû bon.
O mae o l'ëa de quelli,
ma ormai o s'é inversòu
coscì me deciddo
a spûâ o vomitòu
e a dîghe in sciä faccia:
"ti fae proprio schinfio lûmassa!!..."
Sciû dagghe, camminn-a,
i tempi son cangiae;
ti dormi? Ti no veddi
che mai ciû d'òua
gh'é bezeugno de celeritae?
Camminn-a e, ben inteiso,
verso e stradde ciû nette,
verso a diression do ben
che da troppo tempo
solo o se promette.

Questa lûmassa coscì aççidentä
in Fransa nasciûa
e "Burocrassia" battezzä,
comme saeiva ben
se a-o ciû fïto da Zena
a se poeise arrancâ
e magari a San Pê...
mangiâla in fracassâ!

Giuse Casai