Quande a-a mattin
arvo o barcon
ch'o dà in sciö mae giardin
o çê e o mâ de Nervi,
co-o sciöco ò co-o meistrâ,
libeccio o ponentin,
son zà n'incanto.

Co-a bonassa o sô,
da primm'attô, o reçita a sò parte
e o scôre a-a riva e barche;
s'asmortan e lampare
comm'han zà faeto e stelle,
in te rae l'argento vivo o säta:
pä ch'o veugge andâ con quelle.

Co-o sciöco e nûvie in çê
se fan sempre ciû grixe,
sto vento o spuncia e onde
a fâse ciû cattive
e a arrigoelâ
a giaea in sce l'aenin
òua con asbrïo, òua cian cianin.

E quande tïa o libeccio,
i mòuxi scadennae
se franzan contr'a-i scheuggi
ch'arrezan o Castello,
sprûssando in sciä marinn-a
o mâ, che faeto scciûmma,
o pä 'na gianca brinn-a.

Da-o portixeu addormïo
i öchin s'isan d'asbrïo
a fâ 'na rionda in çê
pe salûtâ, co-i oivi,
co-e parme di giardin,
o giorno ch'o rinasce
e di Somaschi o campanin.

Giuse Casai