Sottorïa
comme 'n'artëia
ti scöri in to centro
da çittae
e comme 'n'artëia
t'ë importante.
No t'ë s'intende
'na stradda scignorile
i teu ödoi
san de frïtûa
de sûo
de fadiga.
Ma t'ë importante,
Sottorïa,
interessante e anche bella.

Chi veu vedde a vitta
da çittae
o deve gïâ
tutti i teu vòrti
fermâse pe ammiâ chi passa:
o neigro
o portuale
a legera
a scignorinn-a
ch'a va de sprescia
oppûre 'na pövea donna
ch'a no conosce ätro amô
che ti
e i caroggi vixin.

E veuggio dïte ancon,
Sottorïa,
che t'ë 'n to mae cheu
perchè t'ë a fetta ciû dôçe
da mae çittae.

Luigi Cornetto