|
L'accoglienza che n'ei dimostrôu a l'ha passôu i limiti de qualunque previxon. Appena misso in vendita o primmo numero de sta rivista, l'è cominçôu a inversase in redazion muggi de lettere, de cartolinn-e, de giornali, de libbri che paivia d'ëse â posta centrale. No ô creddeivimo mai ciù. O speravimo tanto in nomme da nostra Zena, da nostra parlata ma aivimo tanta pûia de no ëse capii, d'ëse piggiae pe i soliti «sporcaquaderni» che han tempo e palanche da caccià via. Invece emmo ascistîo ao miracolo de vedde a rivista esaurîa e de doveila ristampâ pe no scontentâ tutte quelle personn-e che, ritornae da-a villezzatûa, ean arrestae sensa. E lettere ch'emmo riçevuo son squaexi tutte in zeneize e questa a l'è a cosa che ciù a n'ha faeto piaxei. Certe son staete spedîe d'in çittae ma tantiscime son arrivae da tutte e parti d'Italia e dall'America dove gh'ea di nostri frae che sentivan o bezêugno de fâne capî a sò gioia, a sò commosciôn. No emmo vergheugna a dì ch'emmo ciaento. E parolle semplici e sincere, i conseggi, l'incoraggiamento, magari a critica dûa ma senza cattiveia - comme san fâ solo i liguri - n'han toccôu profondamente o chêu e n'han compensôu pe tutti i sacrifiçi e-e fadighe ch'emmo dovûo affrontâ pe fâne leze. N'ha faeto tanto piaxei anche i mugugni: anche se çerte critiche l'aspëtavimo ed eimo pronti a risponde. Comme a polemica da grafia, ch'a ne portieiva tanto lontan. In zeneize nisciun scrive a-o stesso moddo e ognun credde de seguî o metodo giusto. Noiâtri n'ô pretendemmo e comunque faiêmo do nostro megio pe uniformase in sce unn-a grammatica «standard». Ma pe o momento ne pâ ciù utile fâ di sbagli ciûttosto che no concludde ninte comme quelli che restan soli - e no tentan manco de fase accapî da-i atri - a studiâ in sciö passôu. Noiatri sentimmo o doveì d'ëse zeneixi d'anchêu e no de vei. O passôu, semmai çerchemmo de ricordaselo quande l'è poscibile; ma tegnimmo sempre presente che i tempi cangian, che e lengue se trasforman e che l'è necessaio, se voemo mantegnîle vive, tegnise in sciâ stradda de mezo ch'a l'è poi sempre quella giusta. A tutti quelli ch'han vosciûo dimostrâne a sò simpatia, scrivendone, aviescimo vosciûo risponde. Ma l'ea imposcibile. Ringraziemmo âoa, a sta manëa, quarchedunn-a de ste cäe personn-e, senza offeisa pe quelle che dovemmo ascordase pe via do spazio: o sciô Davide Borneto ch'o n'ha mandôu un libbro de poesie; Ezio D'Oria ch'o n'ha scrîto da-a Valle d'Aosta; o commediografo Emilio del Maestro, Piero Bozzo da Torin, Giovanni Cattanei, Mario Rivello da Moassann-a, Ettore Chiappe da Reggio Emilia, o professô Alfredo Gismondi, o sciô Carlo Parmini, o sciô Giuseppe Calza e tanti, tanti atri... Grazie, zeneixi, tante grazie. * * * A Lanterna a se vedde da 40 miggia,
|
