|
DA PËGI IN VENEZUELA PE FONDÂ «BAMBILANDIA»
Un'artista venezuelann-a, originäia de Pëgi, a l'è tornâ in Italia pe rivedde a sò taera, pe riabbrassâ sò môe. A l'ha o merito d'avèi realizzôu a Caracas, unn-a de ciù acclamae compagnîe de figgiêu - quaexi tutti figgi d'emigranti liguri - che reçitan, cantan e ballan a manëa di za famosi minuscoli attôi de Rossaldo. Ester Valdes (a l'è lë a creatrice dô Conjunto Infantil Liliput) a l'è vegnûa in Italia pe salutâ i familiari, ma anche pe riçercâ films e documentari didattici pe-i sò zôeniscimi allievi. A l'è andaeta a Pëgi, a vedde a sò Pëgi. «A m'è restâ in to sangue - a confessa con ûn sorriso ch'o pâ de scusa - anche se ghe son nasciûa squaexi pe caxo». Ester Valdes a l'è figgia de 'na sanremeise e de ûn spagnollo; i sò stavan in to Venezuela. Sò mammà a no riuscïva a avèi fìggi e a l'èa tornâ in patria pe consultâ di specialisti italien. A l'èa restâ in Liguria finn-a quando, doppo 'na serie de cûre, a l'èa riuscîa a realizzâ o sò sêunno: diventâ mammà. Ester a l'è staeta portâ subito in to Sudamerica, dove a l'è cresciûa, ma l'Italia a l'è restâ a sò taera (tanto ciù aöa che a mammà a s'è stabilîa a Napoli) e a gh'è tornâ tûtte e votte ch'a l'ha posciûo. A gh'è vegnûa primma da guerra a studiâ canto e regîa a Milan e a Romma e l'è allôa che se gh'è rivelôu a sò natûa de direttrice artistica ä Rossaldo: a Napoli a l'avèiva organizzôu un Cäro de Tespi di piccin, ch'o l'aveiva faeto «tournées» fortunae. «Bambilandia» a l'è nasciûa çinque anni fa. «Me son ricordâ de l'esperienza de Napoli - a conta - e ho vosciûo tentâ. In scë primme no l'è staeto façile trovâ quaranta figgiêu de temperamento e ciù diffiçile ancon l'è staeto modellâli, fâne di attôi. Eppure, sciâ me credde, se dirizze forse mêgio i piccin che i grendi: son ciù attenti, ciù volonterosi, ciù disciplinae... Ho fadigôu giorno e nêutte; ma con l'aggiutto de mae majo, ho posciûo organizzâ di belli spettacoli e avèi tante soddisfaziôin...». O complesso Liliput (che a scignôa a l'ha «tradûto» in Bambilandia) o l'è nasciûo, comm'emmo dîto, in to 1953, raggruppando 40 figgiêu dai 7 ai 15 anni; pe-a maggioranza son figgi de italien, sette o êutto figgi de zeneixi. I sò nommi son: Italo Cèsari, Milvia Cèsari, Sandra Acosta, Teresa Tini, Antonio Josè Olivieri, Ricardo Martinez, Luciana Ariata, Luis Medina, Gonzalo Olivieri, Mumita Calvo, Marieta Calvo, Rafael S. Molina e Lilia Torrealba. A compagnia a n'ha de limite a-o sò campo d'attivitae. Tutte e domeneghe a realizza un programma pe a T.V. in sciö IV o V canale, interpretando scenette de varietae scrîte dä sciâ Valdes, cantando e ballando (molto richiesta a tarantella) e reçitando atti unici do mêgio teatro drammatico. Ogni numero o l'ha un successo comme pochi atri, a-o punto che o quotidian «La Esfera», o dedica a-o complesso artistico unn-a pagina settimanale. Poco tempo fa a compagnia a l'ha tegnûo cartellon pe ûn meize a-o «Nacional», o teatro comunale da capitale, con a rivista in duï tempi «El loco dice rataplan... plan!», scrîta dä Valdes e da sò maio Pedro Layatorres. Protagonisti son staeti duï figgiêu italién, frae e sêu, che in to Venezuela son ormai famosi comme e quanto i mêgio artisti televisivi: Italo e Milvia Cèsari. Dell'iniziativa ha finîo pe occupäsene anche o Governo, ch'o l'ha istituîo unn-a specie de «Oscar» pe o mëgio attô da compagnia; o premio o l'è staeto intitolôu a ûn antigo eroe indio, «Quaicalpuro». Anche e compagnie regolari e finn-a o cinema se son accorti di mêgio elementi dô «Conjunto Infantil». «Quarchedun finiâ a Hollywood», dixe a sciâ Valdes e ghe brilla de ciù i êuggi. A sto punto ghe domandemmo de lë, da sò carriera artistica: a sciâ Ester, ch'a l'èa staeta fin'aöa generosa de notizie in scï sò «piccin», a diventa riservâ e a stento riuscimmo a savèi ch'a componn-e canzôin pe-a sò «Bambilandia» che a-e interpreta quaexi tûtte e tante a l'ha incise in scï dischi che han ottegnûo ûn grande successo. A no l'ha figgi, ma a s'è affezionâ a unn-a figgetta che a l'adotta. «Sciâ n'ha faeto unn-a piccola attrice?» ghe domandemmo. «G'han assegnôu ô «Quaicalpuro» de quest'anno» e i êuggi, ciù che a voxe, tradiscian l'intimo orgoglio. NINO BERRUTI [ Inderrê ] |
