«Méssa Zenéize»

Santoâio de Sànta Crôxe, Céive Lìgure
Méssa in italiàn
Traduçión zenéize de præ Lusciàndro Carbón, Frànco Bànpi e Marîa Viétz

Quésta «Méssa Zenéize» a l'é stæta patrocinâ da-o Lions Club "Santa Croce". Pe quésto o librétto o ripòrta in zenéize a stöia do Santoâio, a poexia Sànta Cróxe do Pierìn Bózzo e a traduçión in zenéize da Preghiera dei Lions, do Codice dell'Etica Lionistica, di Scopi del Lionismo e da Missione dei Lions Clubs International.

Prìmma letûa

[ Atti 8, 5-8.14-17 ]
Da-i Àtti di Apòstoli

Inte quélli giórni ⁵o Féipo, ch'o l'êa chinòu inta çitæ de Samarîa, o l'anonçiâva a loiâtri o Cristo. ⁶Òua e génti stâvan bén atPnte a-e cöse dîte da-o Féipo e êan un tùtt'un into sentî e inte l'amiâ i ségni ch'o fâva. ⁷De fæti da tànti indemoniæ sciortîva spìriti inpûri criàndo a gràn vôxe e tànti paralìtichi e rànghi êan goarîi. ⁸Gh'é stæto alôa gràn giöia inte quélla çitæ.
¹⁴Avéndo pöi i Apòstoli in Gerusalèmme sentîo che a Samarîa a l'àiva acetòu a paròlla de Dîo, gh'àn mandòu o Pêo e o Gioàn ¹⁵che, chinæ, àn pregòu pe loiâtri pe fâghe riçéive o Spìrito Sànto. ¹⁶De fæti in sce nisciùn de loiâtri o l'êa ancón chinòu, ma sôlo êan stæti batezæ into nómme do Segnô Gexù. ¹⁷Coscì inponéivan e moén in sce de loiâtri che riçevéivan o Spìrito Sànto.

Paròlla de Dîo
Rendémmo gràçie a Dîo

Sàlmo responsoriâle

[ Salmo 65 ]

Ritornéllo: Grénde són e òpere do Segnô.

¹Aclamæ a Dîo da tùtta a tæra,
²cantæ a-a glòria do seu nómme,
dæ glòria a-a seu löde,
³dî a Dîo: «Cómme són mâvegiôze e teu òpere!
Ritornéllo: Grénde són e òpere do Segnô.

⁴Che a ti s'inchìnn-e tùtte e génti da tæra,
che te suniàn ìnni, cantàndo o teu nómme».
⁵Vegnî e amiæ e òpere de Dîo,
miràbile into seu agî vèrso i òmmi.
Ritornéllo: Grénde són e òpere do Segnô.

⁶Lê o l'à cangiòu o mâ in tæra fèrma,
àn atraversòu a pê o sciùmme;
la émmo gioîo in lê:
⁷co-a seu poténsa o dòmina o móndo.
Ritornéllo: Grénde són e òpere do Segnô.

¹⁶Vegnî, stæ a sentî, tùtti voiâtri che teméi Dîo,
e ve contiö quànte o l'à fæto pe mi.
²⁰Ségge benéito Dîo perché o no l'à refuòu a mæ oraçión
e a seu misericòrdia o no l'à retiòu da mi.
Ritornéllo: Grénde són e òpere do Segnô.

Segónda letûa

[ 1Pt 3, 15-18 ]
Da-a prìmma létera de Sàn Pê Apòstolo

Carìscimi, ¹⁵santificæ Cristo Segnô inti vòstri cheu, de lóngo prónti a dâ 'na rispòsta a chi ve domànda raxón da sperànsa ch'a l'é in voiâtri. Ma con gàibo e respétto, ¹⁶con 'na bónn-a coscénsa coscì che inte quélla cösa pe-a quæ pàrlan mâ de voiâtri ségian scöxîi quélli che malìgnan in sciô vòstro bón comportaménto in Cristo.
¹⁷De fæti l'é mêgio sofrî faxéndo o bén, se l'é veraménte a voentæ de Dîo, che faxéndo o mâ.
¹⁸Perché Cristo ascì, 'na vòtta pe tùtte, o l'à patîo pe-i pecoéi, giùsto pe-i ingiùsti, de mòddo che poêsci avixinâve a Dîo, mìsso a mòrte inta càrne, ma réizo vîvo into spìrito.

Paròlla de Dîo
Rendémmo gràçie a Dîo

Alelóia

Alelóia, Alelóia

Se un o me veu bén, o daiâ a ménte a-a mæ paròlla, dîxe o Segnô, e o mæ Poæ o ghe voriâ bén e noiâtri vegniêmo a lê

Vangêlo

[ Gv 14, 15-21 ]
Letûa da-o Vangêlo segóndo Gioàn.

Glòria a ti, òh Segnô.

Inte quéllo ténpo o Segnô o l'à dîto a-i seu discépoli: ¹⁵«Se me voéi bén, daiéi a ménte a-i mæ comandaménti. ¹⁶E mi preghiö o Poæ ch'o ve daiâ 'n âtro Consolatô de mòddo ch'o ségge con voiâtri pe de lóngo: ¹⁷o spìrito de veitæ che o móndo o no peu riçéive perché o no o védde e o no o conósce. Voiâtri o conoscéi perché o sta vixìn a voiâtri e o saiâ in voiâtri.
¹⁸No ve lasciö òrfani, vegniö da voiâtri. ¹⁹Ancón in pö e o móndo o no me vediâ ciù, voiâtri invêce me vediéi perché mi vîvo e voiâtri viviéi.
²⁰Inte quéllo giórno voiâtri conosciéi che mi són into Poæ, voiâtri in mi e mi in voiâtri.
²¹Chi gh'à i mæ comandaménti e o ghe da a ménte, quéllo o l'é chi me veu bén; chi me veu bén o saiâ amòu da mæ Poæ e mi ascì ghe voriö bén e mi me faiö védde da lê.

Paròlla do Segnô
Löde a ti, òh Cristo.

Intençioìn de preghêa

Celebrànte: Preghémmo o Segnô con giöia e fidùccia e dìmmo:
(Ritornèllo) Àmen.

1. Che o Segnô, ch'o n'à promìsso o seu spìrito cómme conpàgno da nòstra vìtta e da vìtta da Gêxa, o n'ascìsta inte prêuve e o ne mantêgne into seu amô.
   (Ritornèllo) Àmen.
2. Che o Segnô o lêve e divixoìn da-e Gêxe e ch'o l'unìfiche inta solidarietæ tùtte e comunitæ cristiànn-e da tæra.
   (Ritornèllo) Àmen.
3. Che o Segnô o ne fàsse rispónde a-e calùnie co-a veitæ, a-e òféize co-o perdón, a l'òdio con l'amô, a l'indiferénsa co-o diàlogo.
   (Ritornèllo) Àmen.
4. Perché chi govèrna e nòstre tære e e nòstre génti de Ligùria o no s'ascòrde mâi da nòstra Stöia, de nòstre tradiçioìn, da nòstra léngoa e o l'àgge a fòrsa e a voentæ de fâne ritornâ gréndi cómme sémmo stæti pe tànti e tànti sécoli.
   (Ritornèllo) Àmen.
5. Perché Zêna, Çitæ de Marîa Santìscima, e a Ligùria, mìsse sótta a proteçión da Madònna Regìnn-a de Zêna, sàcian meritâse st'ònô travagiàndo pe-o bén de tùtti inta testimoniànsa di valoî do Vangêlo.
   (Ritornèllo) Àmen.

Celebrànte: Te rendémmo gràçie, òh Dîo nòstro Poæ pe-o spìrito de veitæ ch'o ne fa avéi memöia de Gexù Cristo teu fìggio e o têgne vîvo in noiâtri l'amô pe-i teu comandaménti.

Pe Cristo nòstro Segnô
Àmen