Gh'é ûn reboggî
de scciumma gianca
ch'a se desfa e a se rifâ,
spuncià comm'a l'é contra a-i scheuggi.
I cavalloin
erti, potenti,
da-o largo arrivan:
da-e creste spûmezzanti
'na nÛvia de stisse a s'ïsa.
L'é festa pe-i öchin de mâ:
crian,
sfrecciando se gh'infian
e poi sciortan in erto.
Viran, se bollan
e, çerto,
ti t'aspëti in to mòuxo l'impatto.
D'ûn tratto
invece gïan e ripartan pe l'äia
a recammâ i sò xeui
contra e nÛvie do çê
e contra a-i venti che sciûscian,
che no dan paxe
a l'aegua tormentâ
ch'a sbatte e a resbatte
con scciocchi de scoriae
e fracasso de troin,
e voxe ròca
ch'a te dixe,
quande a se retïa,
o strascinâ e o robattâ
di magheu in sciö fondo.

Antonio Fioravanti