In fondo a un caroggio
de Zena antiga,
streito che ti ghe passi appenn-a appenn-a,
scûo, pin de ravatti, rûmenta, bottigge rotte,
gh'é 'na ciassetta
ch'a te spalanca o çê.
Lì gh'ëa 'na vegetta ûn pö arrensenïa,
con de gatti 'na côa
che appreuvo, davanti, in mëzo a-i pê
se davan da fâ
a domandaghe da mangiâ.
E lê, a vegetta, a ghe parlava:
"Me faiei cazze; staevene ûn pö ciû in là.
Ciû tardi, òua l'é fïto,
a neutte a l'é lunga
e poi aviei famme!
L'é mëgio se mangiei ciû tardi...
Sciû, stae bravi, no seggei testardi!"
E invece i gatti a gnaognâ,
a no dâsene inteisa: veuan mangiâ.
"Stae bravi, ho dïto,
vegniö da voî fra 'n pö..."
E quelli a ragnâ
intanto ch'a l'andava verso casa sò.
"Me conoscei, o sei che ve veuggio ben,
aspetaeme, vaddo in casa e vegno zû.
Ve porto quarcösa..."
A l'ëa 'na scena bella, delicâ...
A m'ha visto che amiavo i gatti
che stavan a aspetâ.
"Cöse sciâ veu, scignoro...
povie bestie, fan compascion..."
E, dixendo coscì
a s'é infiä in to seu porton.

Antonio Fioravanti