In sce-e muage do Zerbin
de festa,
de feriali
doppo l'ôa do disnâ
gh'é di ommi a zûgâ.
Son personn-e d'etae diversa:
zoeni,
vëgi,
in compagnia tûtti quanti
appascionae
di accosti e de bocciae.
Gh'en di campi da poviëti
redossae a-e mûage antighe:
ûn ciû sciû,
l'ätro de sotta
missi in fila a scainâ
perché a stradda a l'é in montâ.
Han de fianco quarche erboëto
ch'ho dà rezzo
e o ten frescûa
a-a gazeu, a-a bïra, a-o vin
pe-i zûgoei descamixae
tûtti rosci e ascadae.
Passa gente lì de fianco:
a se ferma,
a l'ammia.
Forse a pensa (con invidia?):
- Beati lô che peuan zûgâ
mentre mi ho 'n gran da fâ!
E a riparte lesta lesta,
ma de voxi a-i rincöre
pe-e mûage do Zerbin:
- Giggio accostite, lê o boccia! –
- Pippo, tia o ballin! -

Antonio Fioravanti