T'hae protestòu passoëta
quande t'hae visto
che da l'erboo do figo ho destaccòu
o sò primmo frûto da stagion
ch'o l'ëa staeto zà da ti beccòu.

Da ûn erboo a l'ätro
ti t'ë missa a sätâ comme 'na matta
o tò scigôo de ton o l'aumentava
man man che indifferente
verso ti m'avvixinava.

Paiva che a ogni costo
ti voeisci fâme capî
che quello frûto o t'appartegniva
perché ti l'aveivi visto
primma de mi.

Solo o tò scigôo inscistente
o m'ha faeto raxionâ;
perché ho destaccòu o figo
che lê povea bestiëta
o poeiva ancon mangiâ?

Imbarassâ pe no voei sciatâte
con quello frûto in man
çercavo o posto giûsto da pösâlo
e accontentâte.

Ancon ûn tò xeuo reisegoso e lento
sorva a mae testa,
o l’ea o tò grassie;
s’eivimo capïe mae cäa bestia!

Giuse Casai