T'ë investïo da ûnn'aietta
pinn-a de ödô d'arsella
appenn-a ti sbocchi
da ûn di tanti caroggin
in t'ûn momento ti te rendi conto
che te s'allarga o cheu e i polmoin

Dorman ancon e case
redossae l'ûnn-a in sce l'ätra
ch'han gareggiòu in te l'ëse rinfrescae;
te presentan ûn quaddro sempre neuvo
anche se, da çentanaea d'anni
son staete lì pösae.

In ta conca d'aegua serrä da-o meu
ch'o pä freccia ch'a l'indica o castello,
sempre s'allögia a stagnâse quarche barchetta
comme a porze a l'animo d'artista
o spunto pe 'na pittûa
sempre ciû perfetta.

A completâ o mäveggioso quaddro,
sovrasta l'insemme a passeggiata
che de lì a se parte,
co-e macce di verdi ciû svariae,
impindote sempre ciû o cheu
de godimento e serenitae.

S'accompagna o tò sguardo
a-o campanin che a-a tò drïta
o se eleva verso o çê;
spontaneamente (sensa manco savei perché)
te ven coae de domandâ
se recanto ciû bello a-o mondo gh'é.

Giuse Casai