No sò comme me segge trovä
sola, de seia in sciö meu
vixin a l'ûrtima bitta
dove a casa dov'ëa nasciûa
a se veddeiva tûtta.
A redosso de ätre case intorno
anche se in to scûo
a veddeivo comme fïse de giorno;
no gh'ëea 'na lûxe da-i barcoin
ma i riveddeivo o stesso illuminae
ûn in sce l'ätro
comme in ti tempi passae.
Affiavo i euggi
in sciä giöxia ciû lunga
ch'a dà in sciö terrassin,
quella che pe ûrtima ho serròu
quande pe l'ûrtima vòtta
là drento i pê ho pösòu;
quella che pe tante neutti
aveivo lasciâ averta
ascistendo i mae cäi
quande a salûte e poi a vitta
ûn appreuvo all'ätro
aveivan persa.
Riveddeivo, anche se ciû o no gh'ëa,
o sempre verde bersò
choo faxeiva da teito
a-e colonette intramezzae
da-i vasi de geranio
da-i colori ciû svariae.
Derrê a-e mae spalle
e fêugge d'öu
cacciae da-a lûnn-a neuva
in sciö mâ
l'aexia a-e faxeiva tremâ,
comme e lagrime che i mae euggi
no riuscivan ciû a frenâ,
comme a mae voxe che:
moae, poae, seu, frae!!!
a s'ëa missa a ciammâ.
In risposta, da-a campann-a da Gexa
l'é sunnòu l'Ave Maria,
a novenn-a di morti
a l'ëa ormai zà finïa.

Giuse Casai