|
Unn-a seja d'Arvì, do lontan 1937, môiva a Buenos Ayres un di ciù grandi artisti che possan rende orgogliosi i zeneixi: Pasquale Taraffo, dîto ô Rêua. Quella seja Zena e l'Italia perdeivan un ommo ch'ô l'êa ô simbolo vivo do nostro temperamento geniale; un ommo piccin, semplice e modesto ma tanto abile co-a chitära da diventâ ûn autentico fenomeno. I zoveni fòscia creddian esagerâ sta parolla; ma pei vêgi, pe quelli che ricordan i tempi de Portoia pinn-a de vitta, quande ô Rêua ô s'occupava ciù da muxica che da sò ostaia, san cose voeiva dî sentî sonnâ ô Taraffo. E o ricordan â stessa manëa anche in America dove o l'ëa andaeto anche pe accompagnâ a voxe malinconica dô Cappello. O «Paganini da chitära» - coscì ô ciammavan - ô l'aveiva o grande merito de vegnî da-o popolo, de ësise faeto da solo. A nêuv'anni o fava zâ i primmi accordi: imparê da sò poae, un ferrâ ch'o l'aveiva misso a-o mondo dozze figgi, di quae n'èa sopravisciûo quattro, tutti muxicisti d'istinto comme lë. A quelli tempi i sonnoei éan tutta gente semplice, pinn-a de voentae e de pasciôn che çercavan co-a sò senscibilitae d'artisti de tentâ sempre ciù diffiçili accordi. L'abilitae eccezionale do Taraffo, quando o l'ea ancon zovenotto, a l'ea partìa dai conseggi e insegnamenti de tutta quella schêua de chitaristi ch'a vantava Zena â fin do secolo passôu. Son nommi arrestae in t'a memoia de pochi, ormai; ma che allôa ean famosi, comme ô Ninotto, ô Scevola, ô Frasinetti, ô Cammarata. A vint'anni ô Taraffo o piggiava parte in Spagna a un concorso internasionale. No solo o conquistava o primmo premmio ma o vegniva consciderôu un «fêua classe». Tanto da comensâ a tegnì conçerti; in teatro o in varietaè, davanti a scignori o a personn-e modeste: ghe bastava che ô stessan a sentì. No gh'importava manco de fâse pagâ. Piccin de statûa infastidîo da-o vestî da seja, o l'intrava in palcoscenico squaexi de corsa; o pösava a chitära in sciö sostegno e o comensava subito a sonnâ. In te l'Ottobre do 1925 i giornali de Buenos Aires annunziavan ô sò trionfale debutto in America. Nisciûn ô conosceiva ma l'ea bastôu che «el señor Taraffo» o l'avesse piggiôu in man a grossa chitära a quattorze corde e ch'o l'avesse sonnôu «Capriccio arabo» di Tarrega, a sinfonia da «Norma» e quella da «Semiramide» - ch'a l'ea o sò cavallo de battaglia - pe suscitâ ô ciù cädo entusiasmo propio in to popolo ch'o conscidera a chitära comme un strumento nazionale. Da quello momento o «Rêua» o l'ha diviso a sò attivitae fra l'America e l'Italia. Lontan da Zena o no poeiva stâ e ô reciammo di sò dui figgi, quando o se fava troppo forte, ô costrinzeiva a imbarcase pe ritornâ. Ma un de sti viâgi o l'è staeto sensa ritorno. A vigilia de un grande conçerto, ao Teatro Coliseo de Buenos Ayres dove o doveiva accompagnâ o sò amigo Mario Cappello, o l'ha dovuto ëse ricoverôu all'ûspiâ pe urgente operaziôn de ulcera. Trei giorni doppo, a scienza di ommi a se dimostrava inutile contro o destin. Pasquale Taraffo, a çinquant'anni, o lasciava sta vitta e o dolore in tutti quelli che l'aveivan conosciûo. A «Compagna» de Zena, con unn-a nobiliscima lettera â «Famiggia Zeneize», a reclamava a salma do famoso concertista pe seppellila con solennitae in to Camposanto de Staggen. Ma pe tanti motivi no l'è staeto poscibile. A Zena son invece ritornae e cäe cose do «Rêua», compreisa a sò chitära che a sciâ Taraffo e a figgia Stefania Poggi han offerto a-o Comune A vint'anni de distanza i zeneixi no han scordôu Taraffo: no se ne scordian mai. E scicomme o saiâ sempre un motivo de orgoglio, vorrievan che quarchedun piggiesse l'iniziativa de fâ portà i sò Resti, da-o Camposanto argentin da «Chacarita» a quello da sò çittae natale. Anche se difficile, pe-i zeneixi a saieiva un'impreiza doverosa. ETTORE BALBI [ Inderrê ] |
