|
Dixan che «la lingua batte dove il dente duole». O mae dente marotto son 'e donne. Pe mì 'e donne son sempre staete 'a cosa ciù bella ch'agge faeto o Segnô... E anchêu, povie donne, comme son redûte! Quande no han 'e braghe, 'e veddei vestîe che pan tante campann-e in te quelli vestî a sacco che son tanto brutti! Povie donne câe! Ghe l'han daeta, scì, 'na bella croxe da portâ! Primma de tutto gh'han daeto 'o voto, e coscì l'han faete vegnî antipatiche, pinn-e de prezûmî e de preoccupassion, pêzo di ommi, sempre pronte a ratellâ con sò maio pe 'e idee politiche! Perchè, se capisce, se o màio o l'é gianco, a moggë 'a l'é rossa, e se 'o màio o l'é verde, 'a moggë a l'é gianca de drento e de fêua. Naturalmente 'a donna politica a pensa sempre a-e sciollaie di partîi, e a no s'occupa ciù de sò maio, di sò figgiêu, de casa sò, a no s'abbassa a lavâ 'i piatti, a stiâ 'e camixe, a tegnî 'na bella casa, anche da pôvieti, ma pulita... Povie donne! E coscì perdan tutte quelle virtù ch'aveivan 'na votta, e che ne 'e favan pài coscì belle! E con l'impiego, no ne parlemmo! I scagni son pin de donne, 'e schêue son pinn-e de donne, dappertutto donne, con di scôsae neigri che fan vegnî da patî solo a ammiâli... Pe finn-a in ti distributoî de benzinn-a, donne... a fa 'a reclamme in gîo pe 'e case, ai savoin e ae povie pe lavâ i piatti e 'a giancàia, donne... donne dappertutto! E poi se lamentan perché i ommi no ghe ûsan ciù quelli riguardi de 'na votta, perché no ghe cedan 'o posto in sce-o tranvai o in autobus: perché doviéivan cedilo? Ormai gh'è 'a paritae assoluta fra i dui sessi. E co-a paritae 'e donne, povie mae donne cae, han perso tutto 'o sò fascino, son diventae tanti ommi vestîi da donna. Me fan propio patî, de véddile coscì... Ah, se poesan torna ritornâ donne, solo donne, belle donne, e non mêghesse, né professoresse, né ragioniere! Solo donne! Pe fâ despiâ i ommi e pe rendili feliçi con unn-a euggiâ, pe êse ancon 'e reginn-e do mondo comme 'na votta. Ma! Me dixan che questo o l'é 'o progresso... e in nomme do progresso dovemmo collâ... e taxèì! Bell'affare, ammiae 1à, 'o progresso! Pe-o progresso me tocca anche sciorbîme çerta muxica, mattin e seia! Roba da vegnî scemmi o matti! Radio, televixion, orchestre, fan a chi ne spara de ciù! Muxica da ottentotti e da foreste vergini! E 'a zoentù d'ancheu a se sciorbe quello veleno comme s'o fosse tanto sciôpo! E 'e belle cansôin de 'na votta no 'e sentimmo ciù: dixan ch'a l'é l'urtima modda, roba vegnûa da l'America. Quaexi quaexi perdo 'a stimma de Cristoforo Colombo! Tutte bidonate, mae cai! Comme quella da tersa classe di treni, che l'han abolîa pe fânela pagâ un pô ciù caa... Bidonate! L'atra seia m'han invitôu di amixi in casa sò; gh'ea ben ben de gente. A un certo punto tian fêua o «gira dischi» (ai mae tempi o ciammàvimo grammofono... ma noiâtri êimo inderrê...) e no han o coraggio de méttighe un disco de quelli de modda, tipo tribù de selvaggi? Mi ho protestòu subito, e alloa 'a padronn-a de casa a m'ha dito: «No ghe piaxan? Comme son contenta! Manco a mì me piaxan... Quelle porcaie lì l'émmo accattae apposta perchè credeivimo che ghe piaxessan... Ma î levo subito da mezo...». Anche i âtri invitae ean d'accordio con mì: 'o sei cos'aemmo faeto? Aemmo tiòu fêua i dischi dô Marzari, che 'a scignoa a ghe l'ha tutti, e se semmo faeti tante gôsciae de rîe... se semmo demmoae da matti. Armeno aemmo sentîo de cose belle, spiritose, allegre, e dite in zeneize! Ma pe ritornâ ae donne, ve diô che mae figgia, l'anno passôu a l'aiva 'na serva, 'na zovena de Pentema, de quelle, comm'ê ciamman? Maggiorate fisiche... davanti e derrë pàiva ch'a gh'avesse un obice da çentoquaranteneuve. A l'ea scemma comme 'na corba. Ebben, l'ha vista un regista, de quelli boin... e l'ha... subito acciappâ. Aoa a l'é a posto: in te meno de 'n anno a l'ha faeto o primmo film, o primmo maio e 'o primmo figgiêu. Tutti i giornali e 'e riviste ne parlan, stampan o sò moro, e sò forme... contan 'a sò storia, e a gente a leze e a beive... Ma 'o saei che o mondo o l'é propio abbertoelôu? Povei de noiâtri! Se andemmo avanti coscì, dove andiemo a finî?! Basta! Pe ancheu ve sàio... Vaddo a mugugnâ da 'n'atra parte! O STEVA [ Inderrê ] |
