|
Quessi, anchêu, a l'é qualcösa de ciù de 'na semplice borgâ ai limiti da çittae, i palassi anche chì crescian e vixin a queste novitae gh'é a stupenda costrûziôn da Casa Ripöso pe-i Penscionae da Previdenza Sociale. Appenn-a son arrivöu no me ghe trovavo ciù, ma subito ho arsöu i êuggi lasciù pe-a collinn-a verde: o Fossati o l'ëa za là ch'o me salutava. Andâ a trovâ o Fossati l'é comme andâ a passâ 'na giornâ in t'en giardin de montagna, all'äia sann-a, tra e ciù varie specie de piante, in te un ambiente ch'o l'é in gran parte un bersô. Gh'é a vasca di pesci, o zêugo da bocce e 'na massiccia baleûstrâ dove se sta tanto voèntëa appoggiae a godise o panoramma. No son staeto çerto mi o primmo a scrovî quello pösto ideale pe scordâ un pö o traffego do centro, in lieta compagnia, a töa all'averto, a parlâ de personn-e e de ricördi cäi!... Gh'ën zâ staeti anche o Cappello e-o Carbon; o Mêistro Margutti tante vötte o l'ha espresso o dexideio de andaghe, ma döppo quella frattûa a-o pê...
O Mêistro Margutti pe-o Fossati o gh'ha tanta stimma e tanto affetto, no solo pe-a sò serietae e-a sò sincera amicizia, ma anche perché o l'é staeto o ciù cäo allievo do Cappello e o sò continuatô, e spesso se veddan e parlan de tutto pe poi andâ a finî in ta canson. Tant'è o Margutti o dixe o dixe, ma ä muxica o ghe pensa sempre. Döppo e incisioin do Massa e do Bertorello, anche o Fossati o l'ha inciso quattro cansôin in t'en 45 gïi pe-a Casa Muxicale Arpeggio de Milano, di autori Margutti, Bozzo e Migone. In te questo campo da canzon, o Fossati o l'ha avüo de belle soddisfazioin. In to 1954 o l'ha partecipöu a-o Campanin d'Ou, ä Festa da Cansôn Zeneize a-e Piscinn-e d'Arbâ e, sempre in to maeximo anno, a-o Festival da Cansôn Françeize, a-o Lido, in mezo a tutti i assci do genere, italien e françeixi, cantando «Cheullia» e «Se ghe penso». Pare ch'o segge staeto o famoso Maurice Chevalier a voeì un rappresentante de Zena in te quella manifestazion internazionale. E quest'anno, l'Organizzaziôn ESSEPI a gh'ha assegnôu a «Lanterna d'argento». Incominsavimo a sentî l'äia ciù fresca e a nostra Zena, comme un scenario incantöu, all'appariva a-i mae êuggi in te 'na vixön nêuva e meravigliosa: ciassa da Vittöia con e sò file de luxi, i grattaçê ancon ciù imponenti in to sfondo limpido tra i riflessi e-e ombre da nêutte. Me paìva d'ëse spettatô de un fantastico e splendido sêunno de poesia. I ricordi de cose e de personn-e che han vosciüo tanto ben a Zena, e fotografie co-e muxiche di vêgi e di nêuvi sûccessi, m'han faeto rivedde e figüe che han lasciöu un'ôrma incancellabile in ta stradda da nostra tradiziôn ch'a l'é sempre coscì viva, perché gh'è sempre chi vêu e chi pêu continuâ a tegnî aerto o nomme de Zena in te tutti i campi. Paìva che o relêuio o camminesse ciù aspedïa e o figgio do Fossati o m'ha salutöu da-o cancello, e in te man o tenïva sempre a Lanterna d'Argento ch'o m'aìva portöu a vedde. O Fossati o m'ha accompagnöu un töcco in zû e quande mi da solo ho continuöu squaexi de corsa pe-a disceìsa priosa ch'a passa in mezo a-e ciann-e, ho ancon sentîo a sò vöxe cäda e pastosa ch'a me diva: t'aspêto fito con l'Anselmi e cö Balbi pe-a partïa a-e bocce! Camminândo gh'ho criöu: «Ciao, stanni tranquillo, t-e-i porto...» e a ïsa a ïsa son riuscîo a no perde l'ultimo celere. In to tragitto pe arrivâ in ciassa da Vittöia pensavo a quell'atto gentile e scignificativo ch'aveivan avüo pe mi lasciù a Quessi, in te quello pendïo da dove Zena a pâ tanto distante e staccâ: m'aìvan preparöu un döçe con scrïto: «Zena ti vivi». O titolo de unn-a mae poesia. MASSIMO BROGI
[ Inderrê ] |
