Addio monti... ë scì, cäo Manzoni, propio coscì: addio monti, addio mâ, addio villezzatûa. Ma doppo tanto giandonâ, fa finn-a piaxei tornâsene un po' a casa. O bello però o cominsa quando se dà recatto all'armäio. «Tailleurs», cappotti, vestî dell'anno passôu, fan subito pensâ all'antiquâio. Comme se fa, diggo mì, a portâ de quella rôba lì, aöa che a vitta l'arriva in sce-o stêumago? (ho dîto stêumago e no pëto).

Coscì doppo o riposo estivo, cominçan e fadighe autunnali. Telefonate â sarta pe-e ciù recenti informaziôin a quae, comme primmo orientamento, a te dixe de cacciâ via tutto, perchè quest'anno a modda a dixe: spalle curve, fâda curta, vitta ancon de ciù e colli che squaexi toccan e zenogge. Doppo trae ôe de conversazion, ti ne passi çinque davanti a-o spêgio pe studiâ a tò figûa e poi, se no ti vêu fâla brutta, ti convegni che a modda a l'è 'na gran bella cosa, ma che bezêugna andâghe apprêuvo quello tanto che ven ben, perchè unn-a bella donna a restiâ sempre bella anche se a modda a voêse fâla brutta e pe chi ô l'è un pô meno, a cosa ciù simpatica a l'è d'avèi bon gusto e de portâ a rôba con disinvoltûa, lasciando a-e «stars» l'eccentricitê.

Però, sempre senza esagerâ, me pâ che â fin da fôa questi duï cappi che ve presento, saeggian bon portâ, me pâ propio che possan fâve belle. Ma sorvea tutto, spero propio che ve piaxan.

LISETTA