Emmo faeto çinque domande a di zeneixi illustri:

Pe quanto distante da tanto tempo e coscì impegnôu in to travaggio, scià l'ha mai pensôu a Zena?
Quale ricordo e quale posto da çitae gh'è arrestôu ciù cao?
Scià l'ha mai sentio o bezêugno de parlâ in zeneize?
Ghe pä utile conservâ e fâ conosce a nostra parlata? Scia credde ch'a l'agge un sò valore esprescivo?
In quale forma: prosa, teatro, canzoin e folklore, ghe pa che o nostro dialetto o segge ciù simpatico?

Lauro Gazzolo

Sciâ l'avieiva dovûo domandâme se, in tutti sti anni de lontanansa, m'è mai capitôu de no pensâ a Zena. Qualche votta, pe a veitê: quando penso a Nervi, dove son nasciûo.
O Lido d'Arbâ dove - son passae vintiçinqu'anni - in te unn-a de quelle seiann-e silensiose e profumae da primmaveia zeneize, ho conosciûo a donna ciù cäa do mondo, mae moggê. (Ho dîto «silensiose», ma me riferiscio, ripeto, a vintiçinqu'anni fa).
Quande devo scaregâ i mae nervi, contro un autista scciappin, un esattô pretenscioso o un malcacco qualunque, me sciortan da' bocca de esprescioin propio zeneixi. E o me succede abbastanza spesso.
Dixan che conto ben e barzellette; e ciù belle figûe l'ho faete contandole in zeneize.
A prosa. E o l'ha dimostrôu in t'a manëa ciù ciaea ä televixôn, poco tempo fa, o nostro grande Gilberto Govi.

Scì, sovente; anche se ho viaggiôu tanto, posso asseguâ de no aveì mai scordôu a nostra bella Zena.
A vista de Zena da-o Righi, de nêutte, co-e luxi da çittae che se speggian in sciö mâ.
Sens'âtro. Anzi mì e mae mammâ usemmo spesso o moddo de dì: O côre ciù lë che o can do Lecce.
Conservâ a nostra parlata, scì, d'accordo; e diffondîla, anche. Ma fâ in moddo che a parlâla seggian solo i zeneixi perchè i foresti ghe faieivan perde a sò ciù bella caratteristica: a pronunçia muxicale.
O teatro dialettale che pe mì o l'ha un solo nomme: Gilberto Govi.

E chi no ghe pensa?
I ricordi cäi son tanti e dìne un solo l'è fa torto a tanti âtri. Me limitiô ad ûn ricordo affettoso ch'o l'è de tutti: i mae parenti e, con lö, a mae Sanremmo.
Scì... quando mangio a fainâ.
Penso che conservâ o propio dialetto segge utile, specialmente pe poeì trovâ all'estero quelli da propia taera e, con lö, comprensciôn, nostalgia e coraggio. A parlata zeneize a l'è molto espresciva e spiritosa. Pe chi no l'è zeneize o a treuva, con a sò coccina, divertente. A l'è un pittin diffiçile a capise e coscì a l'è poco «esportabile».
A prosa, s'a l'è reçitâ con quell'arte e con quella mezûa che solo o grande Gilberto Govi, «italianizzando» tante espresciôin, o poeiva rende celebre.