zeneise@francobampi.it
 

Intrâ > A léngoa > Coscì coscì, ben ben no guaei > Arasci
[ Inderrê ]

[ Arasci ] [ Bordighëa ] [ Camoggi ] [ Casarsa ] [ Magon ] [ Milleximo ] [ Montäto ] [ Neuve ] [ Nöi ] [ Preboggion ] [ San Pê d'Aenn-a ] [ Savonn-a ] [ Väze ]

Arasci , in provinsa de Savonn-a, a l'é famosa pe-a miagetta, pe-i baxi e pe-a spiägia.

Gh'é da creddighe?

In to 936 l'ëa vegnûo re da Sassonia Otton I, o Grande. In te quello tempo, 'na cobbia de sposi, pe voto, a decidde d'andâ a Romma. Mentre ëan in Piemonte, a Sezzadio, vixin a Acqui, a sposa a l'ha misso a-o mondo ûn bello figgin, Aleramo. No poendolo portâ con liätri, l'han lasciòu lì a 'na mamma pe poi piggiâlo in to viägio de ritorno. Ma tornando inderrê i duî sposi s'ëan amaottïi e ëan morti e a maexima cösa a l'ëa sûccessa a-a mamma. O figgieu o l'ëa dunque arrestòu solo, ma o l'ëa coscì bello che 'n scignoro ch'o l'ha visto o l'ha vosciûo portâlo a-a corte do re Otton, in Germania. Otton o l'ha apprexòu quello figgieu e, pe questo, o l'ha faeto intrâ in ta seu corte.

Òua sûccede che a figgia dell'Otton, Alasia, a s'innamoa dell'Aleramo. Se sa comme van ste cöse chì: l'Alasia a l'ha misso tanto a perde l'Aleramo che ûn bello giorno i duî son scappae da-a Gemania e se so' arretiae in Ligûria, in sciä costa do monte Tirasso. Pe vive l'Aleramo o fava o scciappòu e poi o carbonê, e l'Alasia a ghe dava 'na man. Doppo dexe anni i duî aivan misso a-o mondo ben sette figgieu. De tanto in tanto l'Aleramo o chinnava zû a Albenga. E propio lì ûn çerto giorno o l'ha visto ûn gran remescio. «Cöse sûccede?» o domanda a-o cheugo. «No ti ou sae? Vegne chì o re Otton, pe combatte i Möi!» o ghe risponde.

A questo dî l'Aleramo o s'é sciätòu e o de sprescia o s'é arrampinòu sciû dall'Alasia a dighelo. «Mae poae - a ghe risponde l'Alasia - o l'é 'n ommo de bon cheu, o ne perdoniä, Andemmo zû da-o vescovo, contemmoghe a cösa e sentimmo quae conseggio o porriä dâne». E coscì han faeto. Quande o vescovo o l'é staeto informòu o l'ha dïto: «Miae, che l'Otton o l'é zà chì! E o l'é arraggiòu comme 'n can. O dixe che chì o mangia mä e o no l'arriesce a attrovâ de requie». Pensa che te ripensa, a-a fin han deciso de fâ parteçipâ l'Aleramo a-o torneo co-a bandëa do vescovo. E l'Aleramo, no gh'ëa dûbitâne, o l'ha guägnòu. Pe questo o l'é staeto riçevûo dall'Otton.

Coscì l'Aleramo, co-a moggê Alasia, o l'é andaeto da-o Re, ma o l'ha mandòu avanti i seu sette figgi, con cavagne pinn-e de frûta e de fiori. Appenn-a l'Otton o l'ha visto quelli figgieu o s'é misso a pensâ: «Ma questi figgieu chì me fan vegnî in cheu quarcösa...». Allôa o l'ha domandòu a-o vescovo: «Sciô vescovo, sciâ sa miga chi son questi figgieu? Me pä de conoscili» E o vescovo o l'ha ciammòu l'Aleramo e l'Alasia e o l'ha dïto: «Ecco chì i seu genitoî». L'Otton o l'ha faeto ûn botto in sciä carega. Perdiesann-a, ma quelli ëan propio seu figgia e zeu zennòu! «Basta, no gh'ho ciû coae de soffrî. Ho zà patïo troppo pe viätri duî», e o l'ha abbrassòu tûtti quanti, cianzendo feliçe.

Doppo quarche giorno o l'ha ciammòu l'Aleramo e o gh'ha dïto: «Gh'ho pensòu. Ti t'ae sposòu mae figgia e no ti peu continuâ a fâ o carbonê. Visto che t'ë bravo a combatte, ti me daiae 'na man contra i Möi. Ma òua monta a cavallo e mettite a corrî. Tûtta o territöio che ti arriesciae a crovî in trei giorni de galoppo te l'affidiö e o saiä 'na Marca ch'a portiä o teu nomme».

Ghe ancon chi o conta che, in te l'invexendo da corsa, o cavallo dell'Aleramo o l'agge perso un faero. Lê allôa o l'ha çercòu ûn maniscarco, ûn martello, quarcösa pe rimette a posto quello faero, ma ninte. A 'n çerto punto o l'ha attrovòu ûn mon e con quello o l'ha aggiûstòu o faero a-o cavallo. L'é andaeta coscì che quella zona a l'ha piggiòu o nomme de "Monferròu".

Tornòu inderrê, vixin a-o monte Tirasso dove o l'ëa staeto pe tanti anni, l'Aleramo o l'ha fondòu 'na çittae e o l'ha ciammä Arasci, da-o nomme de seu moggê Alasia. E in to stemma do Comûn se vedde scortî, de feua da tôre, a faccia de 'na donna: a bella prinçipessa che pe amô a l'aiva faeto a carbonaea.

Piggiòu da Divo Gori, Dario G. Martini, La Liguria e la sua anima,
4a edizione, Sabatelli, Savona, 1967 p. 107-109.