Intrâ >
A léngoa >
Coscì coscì, ben ben no guaei >
O preboggion
[ Inderrê ]
[ Arasci ] [ Bordighëa ] [ Camoggi ] [ Casarsa ] [ Magon ] [ Milleximo ] [ Montäto ] [ Neuve ] [ Nöi ] [ Preboggion ] [ San Pê d'Aenn-a ] [ Savonn-a ] [ Väze ]
O preboggion o l'é 'na mescciûa de ortaggi e de erbe
ch'a serve pe preparâ e menestre, de spesso quelle co-o riso. Pe questo o se deuvia
ascì pe indicâ confûxon, disordine.
Inte 'n cädo doppodisnâ do lûggio do 1097, se sente forte i reciocchi da
campann-a. Quello o l'ëa o segnale stabilïo da-a Compagna 
pe ciammâ i zeneixi a-o Parlamento . Comme mai? Cöse l'ëa mai sûccesso?
Tûtto o popolo zeneise o côre in gexa e là o te gh'attreuva duî vescovi foresti e
o famoso Ghigermo d'Imbraeghi . I quae dixan
a-e gente che beseugna dâse da fâ pe dâ 'na man a-o pappa Urban II ò dunque a Croxâ
partïa in to 1095 a poeiva fallî. Serviva di mainae, da gente bonn-a a vogâ, co-a
voentae de fâ ûn travaggio dûo... ma sensa piggiâ ûn citto! E, stae 'n pö a sentî,
tûtti i zeneixi là presenti se son offerti... de badda! Ma, non se sa ben o perché,
o Ghigermo o l'ha vosciûo che i zeneixi zûessan in gexa questa disponibilitae ch'aivan
manifestòu.
Insomma, comme sae sae, i zeneixi saieivan partïi pe-a Croxâ. Sûccede
però che in to preparâ e cöse pe-a partensa, dexe giorni primma de partî
mancava ancon o mangiâ da portâse appreuvo pe-o viägio e pe-a guaera. Allôa
'na domenega, dûrante a Messa, o vescovo de Zena, Oggiero, o decidde de esortâ
i zeneixi a portâ a-o Mandraccio
tûtto quello che aveivan allûgòu pe fâ da
mangiâ. E inte quella tersa domenega de lûggio l'é sûccesso 'na cösa da no
credde: a-o porto gh'ëa 'na lunga fïa de donne, che portavan roba pe impî a
nave: e primma de neutte a nave a l'ëa bella carega!
Anche di ommi da Compagna ëan anaeti in gïo a esortâ e famigge a dâ da
roba pe-o Buggion . E sbraggiavan in zeneise: «Pe-o Buggion, pe-o Buggion».
L'é coscì che l'é sciortïo feua a parolla "preboggion" pe indicâ e verdûe do
menestron zeneise.
Piggiòu da Vittorio Giunciuglio, I sette anni che cambiarono
Genova (1097 - 1104),
Don Bosco, Genova, 1991, p. 87-88.
